.:: İstanbul Kadı Sicilleri ::.


Bab Mahkemesi 54 Numaralı Sicil (H. 1102 / M. 1691)
cilt: 20, sayfa: 152
Hüküm no: 149
Orijinal metin no: [24b-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Hatice bt. Musa’nın Hüseyin Bey b. Mehmed’den muhâlaa yoluyla boşanması

Mahmiye-i İstanbul’da Tûtî Latif mahallesinde sâkine olup, zâtı ma‘rifet-i şer‘iyye ile ârifân Yusuf Efendi b. Abdurrahman ve Ahmed b. Mehmed nâm kimesneler ta‘rîfleriyle mu‘arrefe olan Hatice bt. Musa nâm hâtun meclis-i şer‘-i şerîf-i enverde, zevc-i dâhili bâ‘isü hâze’l-kitâb Hüseyin Bey b. Mehmed nâm kimesne mahzarında ikrâr ve takrîr-i kelâm edip, mezbûr Hüseyin Bey zevcim olup, beynimizde hüsn-i zindegânemiz olmamağla, mezbûrun zimmetinde mütekarrir ve ma‘kūdun aleyh olan bin altı yüz akçe mehr-i müeccelim ve nafaka-i iddet-i ma‘lûmem üzerlerine ve me’ûnet-i süknâm dahi kendi üzerime olup ve kendiye def‘ ve teslîm eylediğim kıymeti beynimizde ma‘lûme yedi miskāl bir denk altın bilezik dahi bedel-i hul‘ olmak üzre zevcim mezbûr Hüseyin Bey ile muhâla‘a-i sahîha-i şer‘iyye ile muhâla‘a edip, ol dahi ber-minvâl-i muharrer hul‘-ı mezbûru kabûl eylediğinden sonra hukūk-ı zevciyyete müte‘allika âmme-i da‘vâdan zevcim mezbûrun zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim. Zevcim mezbûr Hüseyin Bey dahi benim zimmetimi ibrâ ve iskāt eyledi dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis min Cumâdelâhire li sene isneteyn ve mi’e ve elf.


Şuhûdü’l-hâl: İbrahim Çelebi b. Ahmed, Ali Çelebi b. Bâli, Yusuf Efendi el-imâm, Ahmed b. Mehmed, Ahmed b. Ahmed ve gayruhüm.