Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 440 Hüküm no: 520 Orijinal metin no: [81a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma bt. Mehmed ile çocuklarının miras hususunda Hacı Mahmud Ağa’yı vekil tayin etmeleri Vekâlet Mahmiye-i İstanbul’da Dâyehatun mahallesi ahâlisinden olup Tarsus kasabasında fevt olan Mehmed Ağa b. Ömer’in verâseti zevce-i menkûha-i metrûkesi Fatıma bt. Mehmed ile sulbî kebîr oğulları Osman Ağa ve Hasan Ağa ve sulbiye kebîre kızı Fatıma’ya inhisârı tahakkukundan sonra kendinden asıl ve mezbûrân Osman Ağa ve Hasan Ağa ve Fatıma Hatun taraflarından vekîl ve âharı tevkîle mezûn olduğu zâtlarını ârifân Süleyman Ağa b. el-Hâc Hasan ve Mustafa Efendi b. Mehmed şehâdetleriyle sâbit olan zâtı mu‘arrefe mezbûre Fatıma Hatun meclis-i şer‘-i şerîf-i enverde işbu bâ‘isü’l-vesîka el-Hâc Mahmud Ağa b. Ahmed mahzarında bi’l-asâle ve bi’l-vekâle ve bi’l-verâse ikrâr-ı tam ve takrîr-i kelâm edip mûrisimiz müteveffâ-yı mezbûrun hîn-i vefâtında yanında mevcûde bi’l-cümle terekesini Tarsus kasabası mütesellimi Küçük Hüseyin nâm kimesne bi’l-emâne ahz ü kabz ve benimle müvekkillerim mezbûrâna kable’t-teslîm fevt ve müteveffâ-yı sânî-i mezbûrun terekesini Anadolu’da Nevşehri kazâsı sâkinlerinden yeğeni Mehmed Emin nâm kimesne ahz ü kabz etmekle tereke-i müteveffâ-yı evvel-i mezbûru merkūmdan ve sâir zimem-i nâsda olan hukūkunu erbâbından mahâllinde taleb ve da‘vâ ve ahz ü kabza ve bize îsâl ve irsâle ve husûs-ı mezkûr mütevakkıf olduğu umûrun küllîsine tarafımdan mezbûr el-Hâc Mahmud Ağa’yı bi’l-asâle ve bi’l-vekâle ve bi’l-verâse vekîl ve nâib-i menâb nasb ü ta‘yîn eyledim dedikde, ol dahi ber-vech-i muharrer vekâlet-i merkūmeyi kabûl ve merâsimini kemâ-yenbagī mahâllinde edâya ta‘ahhüd ve iltizâm etmeğin mâ-vaka‘a [bi’t-taleb ketb olundu.] Fî 18 L sene [1]242. Şühûdü’l-hâl: Süleyman Ağa b. el-Hâc Hüseyin, Ali bin Hüseyin, Muhzır Ali Çelebi.