Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 441 Hüküm no: 521 Orijinal metin no: [81a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Efendi’nin vârisleri Ali ve Hatice’nin vekilleri vasıtasıyla Rüstem Efendi’den alacaklarını tahsil etmeleri Ahz [ü] kabz, 480 guruş Vilâyet-i Anadolu’da Trabzon sancağında Sürmene kazâsına tâbi‘ Mahnolu karyesi ahâlisinden olup mahmiye-i İstanbul’da Ebulfeth Sultan Mehmed Han medârisinden Başkurşunlu’da sâkin iken bundan akdem fevt olan Mehmed Efendi b. Osman’ın verâseti ammi Ali Efendi ile li-ebeveyn kız karındaşı Hadice’ye inhisârı tahakkukundan sonra mezbûrân Ali Efendi ve Hadice Hatun taraflarından bir kıt‘a vekâlet hücceti nâtık olduğu üzere vekîl olduğu zât-ı mezbûreyi ârifân Mehmed b. Ahmed ve Hüseyin b. Ali şehâdetleriyle sâbit olan Mehmed b. Hasan meclis-i şer‘-i şerîf-i enverde tereke-i müteveffâ-yı mezbûra bi’l-emâne vaz‘-ı yedi mütehakkık olan işbu bâ‘isü’l-vesîka Mehmed Rüstem Efendi b. Abdullah mahzarında bi’l-vekâle ikrâr-ı tam ve takrîr-i kelâm edip müvekkillerim mezbûrân Ali Efendi ve Hadice Hatun’un mûrisleri müteveffâ-yı mezbûrun hîn-i vefâtında yanında mevcûde tahrîr ve bey‘ olunan terekesi esmânı olup mezbûr Mehmed Rüstem Efendi’nin bi’l-emâne makbûzu olan dört yüz seksen guruşu merkūm Mehmed Rüstem Efendi bana def‘ ü teslîm ben dahi yedinden bi’l-vekâle tamamen ahz ü kabz edip min-ba‘d meblağ-ı mezbûrdan merkūm Mehmed Rüstem Efendi’nin yed ve zimmetinde bir akçe ve [bir] habbe bâkī kalmamağla hukūk-ı mîrâsa müte‘allika âmme-i da‘vâdan merkūm Mehmed Rüstem Efendi’nin zimmetinde bi’l-vekâle ibrâ-yı âmm-ı sahîh-i şer‘î ile ibrâ ve iskāt eylediğimde, ol dahi ber-vech-i muharrer ibrâ-yı mezkûrumu kabûl eyledi dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 17 L sene [1]242. Şühûdü’l-hâl: Muhzır Emin Çelebi, Muhzır İsmail Çelebi, Muhzır Feyzullah Çelebi.