Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 442 Hüküm no: 523 Orijinal metin no: [81b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Biricik v. Adam’ın kalpakçı dükkânı gediğinde olan hissesini satması Nısf kalpakçı, 300 guruş Hazret-i Ebâ Eyyûbe’l-ensârî -radiye Rabbihi’l-Bârî- mahallâtından İslâm Bey mahallesinde mütemekkin Biricik v. Adam Nasrâniye tarafından husûs-ı âti’l-beyâna vekîl olduğu şahsı bilir Gabril v. Minas ve Anderyas v. Makar zimmîler şehâdetleriyle sâbit olan Kigork v. Varteres zimmî meclis-i şer‘-i hatîr-i lâzımü’t-tevkīrde işbu hâmiletü’r-rakīm Zümrüd v. Agob Nasrâniye tarafından kezâlik husûs-ı âti’l-beyânda tasdîka vekîl-i şer‘îsi Hazer v. Nikagos zimmî muvâcehesinde bi’l-vekâle ikrâr-ı tam ve takrîr-i kelâm edip mahmiye-i İstanbul’da Kalpakçılar başında kebâbçı ve berber dükkânları beynlerinde kâin bir bâb kalpakçı dükkânı derûnunda mevcûde beyne’l-esnâf gedik ta‘bîr olunur on kalıb ve bir destgâh ve bir dolap ve bir mikrâs ve bir endâze ve sâir âlât-ı lâzıme-i ma‘lûmenin nısfları müvekkilim mersûme Biricik Nasrâniyenin ve nısf-ı âharları âharın ale’l-iştirâki’s-seviyy yedlerinde emvâlleri olmağla ben âlât-ı muharrere-i mezkûrede müvekkilem mersûmenin ber-vech-i muharrer mâlike olduğu nısf hissesini tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile bâ-izn-i şerîk müvekkile-i mersûme Zümrüd Nasrâniyeye üç yüz guruşa bi’l-vekâle bey‘ ü temlik ve vech-i lâyıkı üzere teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl eyledikden sonra semeni olan meblağ-ı mezbûr üç yüz guruşu müşteriye-i mersûme Zümrüd Nasrâniye bana def‘ ü teslîm ben dahi yedinden bi’l-vekâle tamamen ahz ü kabz eyledim. Fîmâ ba‘d âlât-ı muharrere-i mezkûrenin nısfları müvekkile-i mersûme Zümrüd Nasrâniyenin emvâl-i müşterâsı ve hakk-ı sırfı olup müvekkilem mersûme Biricik Nasrâniyenin kat‘a alâka ve medhali kalmamağla mebî‘-i mezkûrun tağrîr ve gabnine müte‘allika da‘vâdan müvekkile-i mersûme Zümrüd Nasrâniyenin zimmetini ibrâ ve iskāt eylediğimde, ol dahi ber-vech-i muharrer ibrâ-yı mezkûrumu kabûl eyledi dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî-selh-i Ş sene [1]242. Şühûdü’l-hâl: Muhzır Emin Çelebi, Muhzır Ali Çelebi.