Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 443 Hüküm no: 524 Orijinal metin no: [81b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Marya v. Yorgi’nin menzilinin bir bölümünü bölerek satması Mübâya‘a 6000 guruş Mahrûse-i Galata hâricinde Beyoğlu nâm mahâlde Hüseyinağa mahallesinde mütemekkine şahsı mu‘arrefe Marya bt. Yorgi Nasrâniye meclis-i şer‘-i hatîr-i lâzımü’t-tevkīrde işbu Corci v. Yani zimmî tarafından husûs-ı âti’l-beyânda tasdîka vekîl-i şer‘îsi Midilli v. Aslan zimmî muvâcehesinde ikrâr-ı tam ve takrîr-i kelâm edip mahalle-i mezbûrede Galatasarayı karşısında vâki‘ bir tarafdan şîruganhâne ve bir tarafdan ba‘zan Barutçubaşı Françesko menzili ve ba‘zan kuyumcu Serope zimmî veresesi menzili ve bir tarafdan Hamaloğlu Şerbethânesi ve bir tarafdan tarîk-i âm ile mahdûd bir bâb mülk menzilin on üç zirâ‘ mahâll-i müfrezi işbu bir kıt‘a i‘lâm-ı şer‘iye mantûkunca akd-i âti’z-zikrin sudûruna değin müstakılleten ve menzil-i mezkûr ittisâlinde vâki‘ ma‘lûmü’l-hudûd bir bab kârgîr dükkânın nısfı benim ve nısf-ı aharı âharın kezâlik i‘lâm-ı şer‘î mûcebince ale’l-iştirâki’s-seviyy yedimizde mülk ve hakkımız olmağla ben menzil-i mezkûrda ber-vech-i muharrer müstakılleten mâlik olduğum on üç zirâ‘ mahâll-i müfrezi ve zikr olunan kârgîr dükkânda mâlike olduğum nısf hisse-i şâyi‘amı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile zevcim müvekkil-i mersûm Corci zimmîye altı bin guruş ile adedi nâ-ma‘lûm bir kabza fülûs-ı mudî‘aya bey‘ ü temlik ve vech-i lâyıkı üzere teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl eyledikden sonra semeni olan meblağ-ı mezbûr altı bin guruşu müşteri-yi müvekkil-i mersûm bana def‘ ü teslîm ben dahi yedinden tamamen ve kâmilen ahz ü kabz eyledim fîmâ-ba‘d menzil-i mezkûrun on üç zirâ‘ mahâll-i müfrezi müstakıllen ve kârgîr dükkânın nısfı zevcim müvekkil-i mersûmun mülk-i müşterâsı ve hakk-ı sırfı olup benim kat‘a [alâka] ve medhalim kalmamağla mebî‘-i mezkûrun tağrîr ve gabnine müte‘allika da‘vâdan zevcim müvekkil-i mersûm Corci zimmînin zimmetini ibrâ-yı âmm-ı sahîh-i şer‘î ile ibrâ ve iskāt eylediğimde ol dahi ber-vech-i muharrer ibrâ-yı mezkûrumu kabûl eyledi dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 22 L sene [1]242. Şühûdü’l-hâl: Muhzır Ali Çelebi, Muhzır Mehmed Çelebi, Muhzır Emin Çelebi, Andon v. Yama.