Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 482 Hüküm no: 571 Orijinal metin no: [88a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sıla-i rahîm amacıyla Trabzon’a giden Bakırcı İskefçeli Mustafa Ağa’nın vekil vasıtasıyla dükkânındaki mallarının satılarak bedelinin alacaklılarına guremâ usulüyle taksim edilmesi Vekâlet, taksîm-i düyûn. Husûs-ı âti’l-beyânın mahâllinde ketb ü tahrîri için savb-ı şer‘-i enverden bi’l-iltimâs irsâl olunan mevlana es-Seyyid Mehmed Esad Efendi mahmiye-i İstanbul’da Sultan Bâyezid Câmi‘-i şerîfi kurbünde Bakırcılar içinde vâki‘ Lonca odasına varıp zeyl-i kitâbda muharrerü’l-esâmî Müslimûn huzûrlarında akd-i meclis-i şer‘-i âlî ettikde vilâyet-i Anadolu’da Trabzon sancağında İskefçe [İskefye] kazâsı ahâlisinden olup mahmiye-i mezbûrede Bakırcı esnâfından olup bundan akdem sıla-i rahîm için kazâ-i mezbûreye azîmet ederken cemî‘ emvâlini semen-i misilleriyle âhara bey‘ ve kabz-ı semen ve semen-i merkūmdan kendi ikrârıyla düyûn-ı müsbetesine alâ-tarîki’l-guremâdan edâ ve teslîme âharı tevkîl eden Bakırcı İskefçeli Mustafa Ağa b. ( ) dâyinlerinden yüz altmış altı guruş iddi‘â eden Yani v. Kostandi zimmî bâ-temessük bin beş yüz guruş iddi‘â eden Âmine bt. Hasan b. Abdullah nâm hatunun dâmâdı ve tarafından husûs-ı âti’l-beyânda vekîl olduğu Veliyüddin b. Ali ve Abdullah b. Mahmud şehâdetleriyle sâbit olan es-Seyyid Osman b. Hüseyin ve kırk guruş iddi‘â eden Panayot v. Yani zimmî ve elli guruş iddi‘â eden Avram oğlu Yorgi v. Tanaş zimmî ve yetmiş üç guruş iddi‘â eden Poliçoğlu Yorgi v. Yoseb zimmî ve kırk üç buçuk guruş iddi‘â eden Barsanoğlu Yorgi v. Nikola zimmî ve doksan üç buçuk guruş iddi‘â eden Mehmed Ağa b. İbrahim tarafından husûs-ı âti’l-beyânda vekîl olduğu Hasan b. Ali ve Mahmud b. Mehmed şehâdetleriyle sâbit olan Hasan b. Ali ve yetmiş sekiz guruş yirmi beş para iddi‘â eden Manil v. Onan zimmî ve otuz guruş iddi‘â eden Vasil oğlu Kavalam v. Adam zimmî ve iki yüz doksan dokuz guruş on para iddi‘â eden Tokatî Abdullah Hoca b. Osman b. Abdullah tarafından âti’l-beyânda vekîl olduğu Hafız Mahmud b. Ali ve Osman b. Ali şehâdetleriyle sâbit olan el-Hâc Mehmed Ağa b. el-Hâc Ahmed ve bâ-temessük sekiz yüz guruş iddi‘â eden zâtı mu‘arrefe Benderli Zeyneb bt. Mehmed nâm hatun ve bâ-temessük sekiz yüzguruş iddi‘â eden merhûm Süleyman Paşa zevcesi Hâce Zeliha bt. Abdullahb. Abdurrahman tarafından vekîl olduğu zâtını ârifân es-Seyyid Ömer Ağa b. Mustafa ve Ahmed Ağa b. Hasan şehâdetleriyle sâbit olan Tâhir Ömer b. Ahmed’den her biri bi’l-asâle ve bi’l-vekâle ikrâr-ı tam ve takrîr-i kelâm edip medyûnumuz müvekkil-i merkūm Mustafa Ağa’nın dükkânında mevcûde müsta‘mel ve cedîd ve hurde ve dâne ve dolma cem‘an üç yüz yedi kıyye nühâsını vekîl-i merkūm el-Hâc Mahmud Ağa sûk-ı sultânîde bey men-yezîd ile bi’l-vekâle bey‘ eylediğinde sâlifü’z-zikr üç yüz yedi vakıyye nühâsın semenini cem‘an dört bin dokuz yüz elli guruşa bâliğ ve mîrîye olan beş yüz guruş deyni ile dellâliye ve mesârif-i sâiresi dahi ihrâc olundukda sahhu’l-bâkī ancak üç bin dokuz yüz elli guruş bâkī kalıp on bin beş yüz otuz bir guruş otuz para düyûn-ı müsbetesi olmağla meblağ-ı mezbûrdan üç bin dokuz yüz elli guruşu düyûnuna taksîm olundukda beher kırk paraya on beş para isâbet eylediği yakīnen ma‘lûmumuz oldukda ol-vechile alâ-tarîki’l-guremâ sehmimize isâbet eden mikdâr-ı meblağı vekîl-i merkūm el-Hâc Mahmud Ağa bize def‘ ü teslîm biz dahi yedinden tamamen ahz ü kabz edip husûs-ı mezkûra müte‘allika âmme-i da‘vâdan gerek vekîl-i merkūm el-Hâc Mahmud Ağa’nın ve gerek Kethudâ el-Hâc Ahmed Ağa’nın zimmetlerini her birimiz bi’l-asâle ve bi’l-vekâle ibrâ ve iskāt eylediğimizde onlar dahi ber-vech-i muharrer ibrâ-yı mezkûrumuzu kabûl eylediler dediklerinde gıbbe’t-tasdîki’ş-şer‘î vâki‘ [hâli] mevlana-yı merkūmûn mahâllinde ketb ü tahrîr. Fî 12 C sene [1]242. Şühûdü’l-hâl: el-Hâc Mehmed Emin Ağa, Osman Ağa b. Ali, Mehmed Bey, el-Hâc Ahmed Ağa, Hafız Mehmed Efendi. [88b-100b arası boş]