Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 481 Hüküm no: 570 Orijinal metin no: [88a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İspiro v. Todori’nin vârislerinin öldürülen Aci Vasil’de kalan alacağını tahsil ettikleri 4000 guruş, ahz [ü] kabz Mahrûse-i Galata hâricinde Beyoğlu nâm mahâlde mütemekkin iken bundan akdem hâlik olan İspiro v. Todori zimmînin verâseti zevce-i metrûkesi Eftimya bt. Yani Nasrâniye ile tahmînen on dört yaşında olup bulûğunu mukırra ve mu‘terife sulbiye kızı Haroşni nâm bikr-i bâliğaya ve sulbî sagīr oğlu Hıristo’ya münhasıra ve tashîh-i meselesi yirmi dört sehmden olup sihâm-ı mezbûreden üç sehmi zevcesi mersûmeye ve on dört sehmi oğlu mersûma ve yedi sehmi mersûmeye isâbeti tahakkukundan sonra şahsını mu‘arrefe mersûme Haroşni Nasrâniye asâleten ve kezâlik şahsı mu‘arrefe mersûme Eftimya Nasrâniye kendinden asâleten ve oğlu sagīr-i mersûm Hıristo’nun vasîyy-i mansûbesi olmağla vesâyeten meclis-i şer‘-i hatîr-i lâzımü’t-tevkīrde bundan akdem katîlen hâlik olan Aci Vasil v. Luka zimmînin verâseti zevce-i metrûkesi Marya bt. Adam Nasrâniye ile sulbî kebîr oğlu Luka zimmîye münhasıra mersûmân Marya Nasrâniye ile mersûm Luka zimmî taraflarından husûs-ı âtîde tasdîka vekîl-i şer‘îleri Nikola v. Apostol zimmî muvâcehesinde her biri bi’l-asâle ve bi’l-vesâye ikrâr-ı tam ve takrîr-i kelâm edip mersûme Eftimya Nasrâniye mûrisimiz zevcim hâlik-i evvel-i mersûm İspiro zimmînin katîl-i mersûm Aci Vasil zimmî zimmetinde cihet-i karzdan beş bin guruş alacak hakkı olup meblağ-ı mezbûrun bin guruşunu sağlığında kabz etmekle bâkīsi olan dört bin guruşu kable’l-ahz ve’l-istifâ mersûm İspiro zimmî hâlik ve meblağ-ı bâkī-i mezbûr benimle kızım mersûmeye ve vasîsi olduğum sagīr-i mersûma mevrûs olup lâkin hâlik-i sânî-i mersûmun cemî‘ malı cânib-i mîrîden kabz olunup ol-vechile terekesi nâmına bir nesnesi kalmadığı bizim ma‘lûmumuz iken biz bu esnâda alacağımız olan meblağ-ı bâkī-i mezbûr dört bin guruş ile meblağ-ı mecmû‘-ı mezbûrun müddet-i ma‘lûmede bilâ-devr-i şer‘î murâbahası olan beş bin guruş ki cem‘an dokuz bin guruş verese-i mersûmândan taleb ve da‘vâya tasaddî ve ol-vechile beynimizde ba‘de vukū‘i’l-münâza‘a el-hâletü hâzihî meblağ-ı mecmû‘-ı mezbûrun bilâ-devr-i şer‘î murâbahası olan beş bin guruş iktizâ eylemediği bize tefhîm olunmağla zevce-i mersûme Marya Nasrâniye ile mersûme Luka zimmî meblağ-ı bâkī-i mezbûr dört bin guruşu bize kendi mallarından def‘ ü teslîm biz dahi yedlerinden tamamen ahz ü kabz ve sagīr-i mersûmun ber-tashîh-i mezkûr hisse-i ma‘lûmesini sagīr-i mersûmun defter-i kassâmına idhâl ettirdip min-ba‘d meblağ-ı mezbûrdan mersûmân Marya ve Luka zimmîler [yedi]nde bir akçe ve bir habbe bâkī kalmamağla husûs-ı mezkûra ve sâir hukūk-ı şer‘iyeye müte‘allika âmme-i da‘vâ ve mutâlebât ve kâffe-i eymân ve muhâsamâtdan mersûme Marya Nasrâniye ile mersûm Luka zimmînin zimmetlerini her birimiz kabûllerini hâvî ibrâ-yı âmm-ı sahîh-i şer‘î ile bi’l-verâse ibrâ ve iskāt eyleyip ve vesâyeten dahi kat‘a da‘vâ ve nizâ‘ım yokdur dedikde gıbbe’[t-tasdîki’ş-şer‘î mâ-vaka‘a bi’t-taleb ketb olundu.] Fî 25 L sene [1]242. Şühûdü’l-hâl: Muhzır Ali Çelebi, Muhzır Mehmed Çelebi, Muhzır Ebûbekir Çelebi, Muhzır Feyzullah Çelebi, Muhzır Abdulfettah Çelebi, Muhzır İsmail Çelebi,