Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 52 Hüküm no: 2 Orijinal metin no: [7b-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim b. Mehmed’in, muhallefâtına el konulan yaya el-Hâc Mustafa b. İbrahim’in vârisi olduğu Rumeli-i ma‘mûre vilâyetinde vâki‘ Koca kazâsı tevâbi‘inden Mizançe karyesi sükkânından olan, udûlden Yusuf Ağa b. Yahya zevvâk-ı sultânî ve Ebûbekir b. Pervâne nâm kimesneler meclis-i şer‘-i şerîf ve mahfil-i dîn-i münîfde -el-masûn ani’t-tağyîr ve’t-tahrîf- hâzırân olup, bundan akdem sefer-i sultânîde fevt olan tâife-i mezkûrenin on altıncı bölüğü yayalarından el-Hâc Mustafa b. İbrahim nâm râcilin muhallefâtına vâzı‘-ı yed olan, elân Atebe-i aliyyede vâki‘ râcilin tâifesine mahsûs beytülmâlin emîni fahrü’l-akrân Ali Subaşı b. Abdülmennân mahzarında, karye-i mezbûre ahâlîsinden râfi‘-i hâze’l-kitâb İbrahim b. Mehmed’den sâdır olan da‘vâ-i sahîha-i şer‘iyyede gıbbe’l-istişhâdi’ş-şer‘î şöyle şehâdet ettiler ki, müteveffâ-i mezkûr el-Hâc Mustafa, müdde‘î-i mezkûr İbrahim’in sulbî oğludur; mezbûr İbrahim onun babası ve usûbet-i nesebiyye cihetiyle vârisidir. Verâseti ona münhasıra olup ondan başka vârisi veya terekeye müstehak kimesne ma‘lûmumuz değildir. Zamânın Koca kadısı Mevlâna Fahrullah b. ( )’den sâdır olan, ünvânıyla mu‘anven, hâtemiyle mahtûm, mazmûnu bu hüccetin mazmûnuyla mutâbık hüccetin kadı-i mezbûrun meclisinden vârid olmasından sonra ve onun meclisinden sudûru, onun hücceti olduğu onun mührü ile memhûr olduğu, isimleri zeyl-i kitâbda mastûr olan Ali b. Bâli ve Mehmed b. Ali’nin şehâdetleri ile sâbit olmasından sonra, şehâdetleri ba‘de’t-ta‘dîli’ş-şer‘î ve’t-tezkiyeti’ş-şer‘iyye inde’ş-şer‘ makbûl ve mûteber olmağın mûcibince hükmedildi. Cerâ zâlike ve hurrire fi’l-yevmi’s-sânî min Rebî‘ilâhir sene isneteyn ve elf. Şuhûdü’l-hâl: Ahmed Beşe b. Cafer, Behrâm b. Abdullah, Ali Beşe b. Mehmed, Ahmed b. Ali, Hasan b. Abdullah, Mehmed b. Sinan, Ahmed b. Osman, el-Hâc Mustafa b. ( ) ve gayruhüm