Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 54 Hüküm no: 5 Orijinal metin no: [8a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Bey’in istiğlâl yoluyla sattığı evden kalan borcunu vakfa ödemesi Vâki‘ olan on yılda minvâl-i mezbûr üzre hâsıl olan otuz bin akçe ücret-i menzilden cânib-i vakfa bir akçe ve bir habbe teslîm etmemeğin sene-i merkūmede mezbûr Mehmed Bey zimmetinde otuz bin akçe ücret-i menzilden ve otuz bin akçe asıldan cem‘an vakf-ı mezbûrun altmış bin akçe hakkı vâki‘ olup lâkin mezbûr Mehmed Bey sene-i mesfûrede zimmetinde asl-ı mâldan olan otuz bin akçenin yirmi bin akçesin cânib-i vakfa teslîm edip zimmetinde on bin akçe asl-ı mâl bâkī kaldıkda yine menzil-i mezkûru zikr olunan dokuz yüz doksan sekiz Muharremi’nde her sene tamâmına bin akçe ücret ile kabûl edip yine sene selâse ve elf Muharremi’ne gelince vâki‘ olan beş yılda hâsıl olan beş bin akçe ücretden dahi cânib-i vakfa bir akçe ve bir habbe teslîm etmemeğin, hâlâ mezbûr Mehmed Bey zimmetinde vakf-ı mezbûr mâlından on bin akçe asıl ve otuz beş bin akçe ücret-i menzil cem‘an kırk beş bin akçe vardır. Hâlâ tevliyetim hasebiyle meblağ-ı mezbûru vakıf için taleb ederin dedikde gıbbe’s-suâl mezbûr Mehmed Bey bi’l-muvâcehe cevâb verip fi’l-vâki‘ menzil-i mezkûru târih-i mezkûrda istiğlâl tarîki üzre cânib-i vakfa otuz bin nakd-i makbûz akçeye bey‘ edip yine menzil-i mezkûru her sene tamâmına üçer bin akçe ücret ile kabûl edip ba‘dehû zikr olunan doksan sekiz Muharremi’nde uhdesinde olan otuz bin akçe asl-ı mâldan yirmi bin akçesin cânib-i vakfa teslîm eylediğinde yine menzil-i mezbûru beher sene bin akçe ücret ile kabûl eylediğin tav‘an ikrâr ve i‘tirâf eyledikde mezbûr Mehmed Bey’den sâdır olan kelâm vukū‘u üzre mütevellî-i mezkûr Sinan Bey talebiyle ketb olundu. Tahrîren fi’l-yevmi’l-hâmis ve’l-ışrîn min Rebî‘ilâhir sene selâse ve elf. Şuhûdü’l-hâl: Mevlânâ Hasan Çelebi b. Osman el-hatîb, Süleyman Bey b. Abdullah ez-zevvâk, Mehmed b. Ahmed el-mü’ezzin, Mustafa b. Ali, el-Hâc Mustafa b. Hızır ve gayruhüm.