Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 60 Hüküm no: 10 Orijinal metin no: [9b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Müderris Şah Mehmed Çelebi’nin oğlu Mustafa’nın vakıf mütevellisi Abdülkerim’den alacağını alması Mahmiye-i Kostantıniyye mahallâtından Ağa Câmi‘i mahallesinde sâkin iken bundan akdem vefât eden merhûm ve mağfûrun-leh Mevlânâ Şah Mehmed Çelebi b. Eyüb nâm müderrisîn sulbî sagīr oğlu Mustafa Çelebi’ye cânib-i şer‘-i şerîfden vasî nasb olunan fahrü’l-akrân Süleyman Çelebi b. Abdurrahman meclis-i şer‘-i refî‘ü’l-bünyâna hâzır olup merhûm İlyas b. Yusuf nâm sâhib-i hayrın vakfına evlâdından meşrûtiyyet üzre mütevellî olan işbu râfi‘ü’l-kitâb Abdülkerim nâm kimesne mahzarında takrîr-i kelâm edip bundan akdem müteveffâ-yı mezbûr Şah Mehmed Çelebi hâl-i hayâtında sene tis‘a ve tis‘în ve tis‘a mi’e Recebi gurresinde mezbûr İlyas vakfıdır deyû mahmiye-i mezbûre ebvâbından Balat Kapısı hâricinde vâki‘ iki tarafı yine mezbûr İlyas vakfı ve iki tarafı tarîk-i âmla mahdûd bir kıt‘a bağçenin yerin mezbûr Abdülkerim’den mukāta‘a ile alıp ücret-i mu‘accele tarîki üzre mezbûra yirmi dört bin akçe teslîm etdikden sonra zikr olunan bağçenin eşcârı olmağın mezbûr Abdülkerim arzını hâli teslîm etmeyip ve zikr olunan bağçenin yeri Ayasofya Vakfı olmağla eşcârın kal‘ edip mezbûra teslîm etmek müyesser olmayıp ve mezbûr Şah Mehmed Çelebi vefât edip icâre-i mezkûre sahîha olmamağla mezbûr Şah Mehmed Çelebi merkūm Abdülkerim’e ücret-i mu‘accele deyû teslîm eylediği yirmi dört bin akçe oğlu sagīr-i mezbûr Mustafa Çelebi’ye intikāl itmeğin, hâlâ meblağ-ı mezbûr yirmi dört bin akçeyi merkūm Abdülkerim yedinden vesâyetin hasebiyle sagīr-i mezbûr için alıp bi’t-tamâm kabz edip ve husûs-ı mezbûra müte‘allik merkūm ile alâka kalmamışdır dedikde vasiyy-i mezkûrun vech-i meşrûh üzre olan kelâmın mesfûr Abdülkerim vicâhen tasdîk edip vâki‘-i hâl gıbbe’s-suâl ketb olundu. Tahrîren fi’l-yevmi’s-sâmin ve’l-ışrîn min Rebî‘ilâhir li sene selâse ve elf. Şuhûdü’l-hâl: Mustafa b. ( ) el-imâm, Ahmed b. Mustafa el-imâm, Kaya Çelebi b. Şaban, Hüseyin b. Abdullah, Murad b. Abdullah, İbrahim b. Mehmed, Ahmed Bey serrâc.