Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 62 Hüküm no: 12 Orijinal metin no: [9b-3, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çavuş b. Habib’in evini bey‘ bi’l-vefâ ile Seyyid Mehmed b. Mustafa’ya sattığı Dârü’s-saltanat-i seniyye mahmiye-i Kostantıniyye mahallâtından Abdi Subaşı mahallesinde sâkin olan mefharü’l-a‘yân Mehmed Çavuş b. Habib nâm kimesne meclis-i şer‘-i şerîfde hâzır olup, âtiyyü’z-zikr menzilini râfi‘-i hâze’l-kitâb mefharü’s-sâdât Seyyid Mehmed b. Mustafa’ya bey‘ bi’l-vefâ tarîkiyle bey‘ ettiğini ikrâr ve i‘tirâf etti. Müşterî-i mezbûr da merkūm Mehmed Çavuş’un işbu akdin kendilerinden sudûruna kadar sâhibi ve mâliki olduğu, elinde ve taht-ı tasarrufunda bulundurduğu, mahalle-i mezbûrede vâki‘ olup, sekiz fevkānî beyti, altlarında ahır bulunan müte‘addid selâmlığı, su kuyusunu, bahçeyi, helâyı ve avluyu muhtevî olan ve bir taraftan bâyi‘-i mezkûr mülkü, diğer taraftan Şehrî Hâtun mülkü, iki taraftan da tarîk-ı âm ile mahdûd cemî‘-i menzili cümle tevâbi‘ ve levâhıkı ve kâffe-i merâsim ve mürâfıkı ile râyicü’l-vakt altmış üç bin akçe-i Osmânî semen-i mu‘ayyen-i makbûz ile zeyilde mezkûr târihden i‘tibâren altı ay va‘de ile bey‘ bi’l-vefâ ile, îcâb kabûl ve teslîm tesellümle iştirâ etti. Vâki‘ ikrâr, müşterî-i mezbûr tarafından bi’l-muvâcehe tasdîk edildi. Sonra Mustafa Çelebi b. Mehmed, menzil-i mezkûrun derkine îcâb ve kabûlü hâvî kefâletle kefîl oldu. Cerâ zâlike fi’l-yevmi’r-râbi‘ min Cumâdelûlâ sene selâse ve elf. Şuhûdü’l-hâl: Abdullah Halîfe b. Mahmud el-İmâm, Hüseyin b. Ali el-müezzin, Ahmed b. Mustafa el-İmâm, Mehmed b. Ramazan el-müezzin, Hasan Ağa muhzırbaşı