Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 62 Hüküm no: 13 Orijinal metin no: [10a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çavuş’un Seyyid Mehmed’e olan borcuna karşılık evini bey‘ bi’l-vefâ ile satışı Mahmiye-i Kostantıniyye mahallâtından Abdi Subaşı mahallesinde sâkin Dergâh-ı âlî çavuşlarından Mehmed Çavuş b. Habib meclis-i şer‘-i şerîfe hâzır olup işbu râfi‘ü’l-kitâb fahrü’s-sâdât es-Seyyid Mehmed b. Mustafa mahzarında takrîr-i kelâm edip bundan akdem zimmetimde mezbûr es-Seyyid Mehmed’e cihet-i karzdan elli bin ve çuka bahâsından bin cem‘an elli bir bin akçe deynim olup ba‘dehû mezbûr es-Seyyid Mehmed yedinden meblağ-ı mezkûr mukābelesinde kendi mülkümden iki kemer raht ve üç aded kemer kılıç ve bir gümüş tîrkeş ve bir gümüş eyer rehn-i makbûz vaz‘ ve teslîm edip ba‘dehû mezbûr es-Seyyid Mehmed’den on iki bin akçe dahi alıp kabz edip zimmetimde cem‘an altmış üç bin akçe hakkı olmuş idi. Hâlâ zikr olunan altmış üç bin akçeye mahalle-i mezkûrede vâki‘ bir tarafı yine benim mülküme ve bir tarafı Şehrî Hâtun mülküne ve iki tarafı tarîk-i âma muttasıl mülk menzilimi mezkûr es-Seyyid Mehmed’e bey‘-i bi’l-vefâ ile bey‘ ve menzil-i mezbûru teslîm edip sâbıkan rehin tarîki üzre teslîm eylediğim sâlifü’z-zikr esbâbı bi’t-tamâm mezbûr es-Seyyid Mehmed yedinden alıp kabz ve tesellüm eyledim dedikde mukırr-ı mezbûrun ikrâr-ı meşrûhun[u] mesfûr es-Seyyid Mehmed vicâhen tasdîk ve şifâhen tahkīk edip vâki‘-i hâl bi’t-taleb ketb olundu. Tahrîren fî yevmi’r-râbi‘ min Cumâdelûlâ li sene selâse ve elf. Şuhûdü’l-hâl: Es-Sâbikūn.