Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 64 Hüküm no: 15 Orijinal metin no: [10b-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kaçak kölenin sahibine iadesi Anadolu-i ma‘mûre vilâyetinde vâki‘ kazâ-i Döğer? tevâbi‘inden Kirişborlu? karyesi ahâlîsinden olan, udûlden Musa b. Ahmed el-hatîb ve Vefa Kethüdâ b. Ramazan meclis-i şer‘-i şerîf-i enverde hâzırân olup, mahmiye-i Kostantıniyye mahallâtından Nebvethâne mahallesinde sâkin olan Hızır Çavuş b. Nasuh nâm hasm-ı câhid mahzarında, râfi‘-i hâze’l-kitâb yine karye-i mezbûre ahâlîsinden Siyami Halîfe b. Hızır’dan sâdır olan da‘vâ-i sahîha-i şer‘iyyede gıbbe’l-istişhâdi’ş-şer‘î şöyle şehâdet ettiler ki, orta boylu, şaşı gözlü, zenci, Nûbiyyü’l-asl, ve elân münkir-i mezbûr Hızır Çavuş yedinde bulunan Mercan b. Abdullah nâm gulâm, müdde‘î-i mezkûr Siyami Halîfe’nin mülk-i mahz-ı ve hakk-ı hâlis-i sırfıdır. Zeyilde mezkûr târihden bir buçuk sene mukaddem müdde‘înin mülkünden kaçmıştır. Şehâdetleri ba‘de’t-ta‘dîli’ş-şer‘î ve’t-tezkiyeti’ş-şer‘iyye inde’ş-şer‘ makbûl ve mûteber olmağın mûcibince hükmedildi. Cerâ zâlike ve hurrire fi’l-yevmi’t-tâsi‘ min Cumâdelûlâ sene selâse ve elf. Şuhûdü’l-hâl: Ahmed b. Ali el-müste‘id, Mahmud b. İsmail kadı, Ahmed b. Abdullah, Hasan b. Abdullah