Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 63 Hüküm no: 14 Orijinal metin no: [10a-2, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. El-Hâc Memi b. el-Hâc Nebi Hân’ın, muhallefâtına el konulan el-Hâc İbrahim b. el-Hâc Nebi Hân’ın kardeşi ve vârisi olduğu Anadolu-i ma‘mûrede vâki‘ Tosya kasabası sükkânından kavaf el-Hâc Ali b. Ahmed ve tâcir el-Hâc Mehmed b. Hasan nâm kimesneler, emâcid-i mükerremîn-i mufahhamîn defterdârlar huzûrunda, Dîvân-ı âlî’de -dâme fî himâyeti’llâhi’l-müte‘âlî- hâzırûn olup, elân Dârü’s-saltanati’s-seniyye mahmiye-i Kostantıniyye’de vâki‘ Beytülmâl-i hâs emîni kıdvetü’l-a‘yân Abdullah Çavuş b. Hızır mahzarında, kasaba-i mezkûre ahâlîsinden râfi‘-i hâze’l-kitâb el-Hâc Memi b. el-Hâc Nebi Hân’dan sâdır olan da‘vâ-i sahîha-i şer‘iyyede gıbbe’l-istişhâd şöyle şehâdet ettiler ki, müdde‘î-i mezkûr yine ahâlî-i kasaba-i mezkûreden olup medîne-i Edirne’ye gider iken fevt olan ve zeyilde mezkûr senenin Rebî‘ulevvel ayının yirmi yedinci günü medîne-i mezkûrede vâki‘ olan muhallefâtından râyicü’l-vakt on bin yüz akçe-i Osmânîsi, terekesini kabza memûr olan mefharü’l-akrân kāid-i sultânî Haydar Çavuş yediyle zabt edilip Hazîne-i âmireye ulaşan merhûm el-Hâc İbrahim b. el-Hâc Nebi Hân’ın ana-baba bir kardeşi ve usûbe-i nesebiyye cihetiyle vârisidir. Babası ve müteveffâ-i mezbûrun babası aynıdır. Anneleri Kadın Paşa bt. Şaban’dır. Verâseti ona münhasırdır. Ondan başka vârisi ve terekeye müstehak kimesne ma‘lûmumuz değildir. Zamânın kasaba-i mezbûre kadısı Mevlâna Osman b. Mehmed’den sâdır olan, ünvânıyla mu‘anven, hâtemiyle mahtûm, mazmûnu bu hüccetin mazmûnuyla mutâbık hüccetin kadı-i mezbûrun meclisinden vârid olmasından sonra ve onun meclisinden sudûru, onun hücceti olduğu ve onun mührü ile memhûr olduğu, isimleri zeyl-i kitâbda mastûr olan Ahmed Bey b. Hızır ve Mustafa Bey b. Abdullah’ın şehâdetleri ile sâbit olmasından sonra, şehâdetleri ba‘de’t-ta‘dîli’ş-şer‘î ve’t-tezkiyeti’ş-şer‘iyye inde’ş-şer‘ makbûl ve mûteber olmağın mûcibince hükmedildi. Cerâ zâlike ve hurrire fi’l-yevmi’t-tâsi‘ min Cumâdelûlâ sene selâse ve elf. Şuhûdü’l-hâl: Ahmed b. İbrahim, Hasan b. Murad, Mehmed b. Abdullah, Mustafa b. Abdullah er-râcil ve gayruhüm