Bab Mahkemesi 54 Numaralı Sicil (H. 1102 / M. 1691) cilt: 20, sayfa: 156 Hüküm no: 156 Orijinal metin no: [25a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Salamon v. Yuda ile İzmit mütesellimi Hüseyin Ağa’nın sulh olması Misine cemâ‘atinden olup medîne-i İznikmid’de sâkin Salamon v. Yuda nâm Yahudi meclis-i şer‘-i şerîf-i enverde, sâbıkan İznikmid mütesellimi olan Hüseyin Ağa tarafından husûs-ı âti’l-beyâna vekîl olan Pîrî Ağa b. Osman nâm kimesne mahzarında ikrâr ve takrîr-i kelâm edip, mezbûr Hüseyin Ağa zimmetinde bundan akdem yedimden iştirâ ve kabz eylediği beynimizde ma‘lûm atlas ve telli hatâyî ve hâre ve yasdık semenlerinden yirmi bir bin akçe hakkım olup, meblağ-ı mezbûra merkūm Pîrî Ağa kefîl dahi olmağla meblağ-ı mezbûru mezbûrdan taleb ve da‘vâ eylediğimde, ol dahi edâdan imtinâ‘ etmekle muslihûn tavassut edip, da‘vâ-yı mezkûremden vekîl-i mezbûr Pîrî Ağa ile beynimizde on iki bin akçe üzerine inşâ-i sulh eylediklerinde, ben dahi sulh-ı mezbûru kabûl ve bedel-i sulh olan meblağ-ı mezbûrun üç bin akçesini nakid ve bâkī dokuz bin akçesi mukābelesinde meclis-i sulhda mevcûd iki çift yasdık ve bir ihrâm ve bir pîştahta ve bir kalın anteri yine vekîl-i mezbûr Pîrî Ağa yedinden bi’t-tamâm ahz u kabz ettiğimden sonra husûs-ı mezbûra müte‘allika cemî‘ da‘vâdan mezbûr Hüseyin Ağa’nın ve mezkûr Pîrî Ağa’nın zimmetlerini ibrâ ve iskāt eyledim dedikde, gıbbe’t-tasdîki’l-vicâhî mâ vaka‘a bi’t-taleb ketb olundu. Fi’l-yevmi’s-sâmin min Cumâdelâhire li sene isneteyn ve mi’e ve elf. Şuhûdü’l-hâl: Ali Çelebi b. Hasan, Mahmud Çelebi b. Mustafa, Hüseyin Odabaşı, Ahmed Çavuş ve gayruhüm mine’l-huzzâr.