Bab Mahkemesi 54 Numaralı Sicil (H. 1102 / M. 1691) cilt: 20, sayfa: 156 Hüküm no: 155 Orijinal metin no: [25a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kırımlı Rukiye bt. Eyüb’ün eski kocasındaki alacağını taksitlendirmesi Mahmiye-i İstanbul’da Atmeydanı kurbunda Suhte Sinan mahallesinde sâkin es-Seyyid İsmail b. Yusuf meclis-i şer‘-i şerîf-i enverde, zevce-i mutallakası Kırımlı Rukiye bt. Eyüb nâm hâtun mahzarında ba‘de’t-ta‘rîfi’ş-şer‘î ikrâr-ı tâm ve takrîr-i kelâm edip, mezbûre Rukiye Hâtun cihet-i deyn-i şer‘îden kırk beş guruş zimmetimde vâcibü’l-edâ deynim olup, lâkin def‘aten edâya iktidârım olmamağla te’cîle tâlib olduğumda mezbûre Rukiye dahi meblağ-ı mezbûru beher otuz gün tamâmında bir guruş olmak üzre târih-i kitâbdan bin üç yüz elli gün tamâmına değin taksît ve te’cîl eyledikde, ben dahi kabûl ve deynim olan meblağ-ı mezbûr kırk beş guruşu ber vech-i mukassat edâ ve teslîme ta‘ahhüd ve iltizâm eyledim dedikde, gıbbe’t-tasdîki’ş-şer‘î mukırr-ı mezbûrun vâlidesi Âlime bt. Mustafa nâm hâtun ba‘de’t-ta‘rîfi’ş-şer‘î meblağ-ı mukassat-ı mezkûra bi’l-emr ve’l-kabûl kefâlet-i sahîha ile kefîl olmağın, mâ vaka‘a bi’t-taleb ketb olundu. Fi’l-yevmi’s-sâdis min Cumâdelâhire li sene isneteyn ve mi’e ve elf. Şuhûdü’l-hâl: Mehmed Efendi b. Abdi, Hüseyin b. Mustafa, Yahya b. Ali, Süleyman b. Mustafa, Mustafa b. Mehmed, İbrahim b. Ahmed, Şâtır Mehmed b. Hasan, İbrahim b. Mehmed ve gayruhüm.