Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 70 Hüküm no: 25 Orijinal metin no: [12a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin b. Hasan’ın Hüseyin Ağa Vakfı’na ait dükkanı kiralaması İşbu râfi‘ü’l-kitâb Hüseyin b. Hasan nâm kimesne meclis-i şer‘-i şerîfe hâzır olup mahmiye-i İstanbul’da vâki‘ merhûm Hüseyin Ağa Vakfı’na hâlâ mütevellî olan Şeyh Ahmed b. Süleyman nâm kimesne mahzarında takrîr-i kelâm edip vakf-ı mezkûrdan Ayasofya kurbunda vâki‘ iki tarafı vakf-ı mezkûra ve bir tarafı Sinan Çavuş Vakfı’na ve bir tarafı tarîk-i âma muttasıl bir bâb dükkân bundan akdem cânib-i vakfa yevmî iki akçe ücret-i müeccele ile taht-ı tasarrufumda iken harîk vâki‘ olup dükkân-ı mezbûr yanmış idi. Hâlâ zikr olunan dükkân yine binâ olunup lâkin zikr olunan binânın ba‘zı benim olmağla dükkân-ı mezbûra âhar kimesne ne mikdâr ücret verirler ise ben dahi ol mikdâr ücretle dükkâna mutasarrıf olup âhara verilmemek taleb ederin dedikde mütevellî-i mezbûr dahi dükkân-ı mesfûra âhar verdiği ücreti mezbûr Hasan verirken dükkânı âhara vermemeğe müte‘ahhid olup cânibeynden sâdır olan kelâm bi’t-taleb ketb olundu. Tahrîren fi’l-yevmi’l-hâmis min Cumâdelûlâ li sene selâse ve elf. Şuhûdü’l-hâl: Mehmed b. Abdullah, Behrâm b. Abdullah, Hasan b. Ahmed ve gayruhüm.