Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 80 Hüküm no: 32 Orijinal metin no: [15b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yeniçerilerden Pervane’nin Samsat sancakbeyi Fazlullah Bey’de olan alacağına karşılık rehin verilen eşya ve evin satılıp borcun bir kısmının karşılandığı Dergâh-ı âlî yeniçerileri zümresinden Birinci Ağa bölüğün[den] Pervâne [b.] Abdullah nâm yeniçeri meclis-i şer‘de hâzır olup Dergâh-ı âlî zağarcılarından Sinan Bey b. Abdullah mahzarında takrîr-i kelâm edip hâlâ livâ’-i Samsad beyi olan mefharü’l-ümerâ es-Seyyid Fazl[ullah] Bey b. es-Seyyid Abdullah zimmetinde sene isneteyn ve elf Şevvâli evâhirinde cihet-i karzdan elli bin akçe ve çuka bahâsından yirmi beş kuruş cem‘an elli bin akçe ile yirmi beş kuruş hakkım vâki‘ oldukda mezbûr es-Seyyid Fazlullah Bey iki kıt‘a murassa‘ hançeri ve mahrûsa-i Üsküdar’da etrâf-ı erba‘ası ma‘lûmu’l-hudûd mülk menzilini merkūm Sinan Bey yedinde rehin vaz‘ edip ba‘dehû târih-i mezkûrda altı ay tamâmında deyn-i mezbûru edâdan mezbûr Fazlullah Bey âciz olursa zikr olunan hançerleri ve menzili bey‘ edip semeni bana teslîm için mezbûr Sinan Bey’i vekîl nasb ve ta‘yîn etmiş idi. Hâlâ sekiz aydan ziyâde olup mezbûr es-Seyyid Fazlullah Bey zikr olunan deyni bana edâ etmemeğin vekîl-i mezbûrdan vekâleti hasebiyle zikr olunan hançeri ve menzili Süleyman nâm dellâl ile mahallî tâlibîne mezâden bey‘ için arz olundukda rağbet-i nâs bi’l-külliye munkatı‘a oldukdan sonra zikr olunan hançer ve menzil on beş bin akçede karâr edip ziyâde bir akçe ve bir habbe verir bir kimesne olmamağın, hâlâ vekîl-i mezbûr vekâleti hasebiyle hançerleri ve menzili on beş bin akçeye bey‘ edip bey‘-i mezbûru merkūm es-Seyyid Fazlullah Bey’in bana deyni için bana teslîm edip ben dahi ondan ahz u kabz eyledim dedikde mâ vaka‘a bi’t-taleb ketb olundu. Tahrîren fi’l-yevmi’s-sâbi‘ aşer min Rebî‘ilâhir li sene isneteyn ve elf. Şuhûdü’l-hâl: Derviş Ağa b. Mehmed, Hasan Çavuş b. Ali, Mehmed Ağa b. Hasan, Mustafa Bey b. Mehmed.