Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 80 Hüküm no: 31 Orijinal metin no: [15a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Salamon v. Miho’nun Keyvan b. Abdullah’a borcunu ödemesi Oldur ki, kasaba-i Kasımpaşa’da sâkin işbu râfi‘ü’l-kitâb Keyvan b. Abdullah meclis-i şer‘-i şerîfde mahmiye-i İstanbul Yahudilerinden Salamon v. Miho nâm Yahudi’yi ihzâr ve mahzarında takrîr-i da‘vâ edip mezbûr Yahudi zimmetinde mâ-beynimizde ma‘lûm dükkân ve sâir emti‘a-i mütenevvi‘a bahâsından kırk dört kuruş hakkım vardır, hâlâ taleb ederim dedikde gıbbe’s-suâl mezbûr Yahudi cevâb verip fi’l-vâki‘ sâ‘î-i mezbûr Keyvan’ın benim zimmetimde zikr olunan dükkân ve emti‘a bahâsından kırk kuruş hakkı vardır, lâkin meblağ-ı mezbûru mukaddem Keyvan’a tamâmen edâ ve teslîm edip hâlâ zimmetimde bir akçe ve bir habbe bâkī kalmamışdır dedikde mezbûr Yahudi’den sâdır olan kelâm-ı sâlif Keyvan talebiyle ketb olundu. Fî 17 min Rebî‘ilâhir li sene isneteyn ve elf. Şuhûdü’l-hâl: Ahmed b. Mehmed, Haydar Çavuş b. Mehmed, Ali b. Abdullah, Hasan b. Abdullah, Muharrem b. Ahmed, Ahmed b. Davud ve gayruhüm.