Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 84 Hüküm no: 38 Orijinal metin no: [17a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Müderris Abdurrahim b. Pîrî’nin eşyalarını gasbetmekle suçlanan Kalender Çavuş’un eşyaları teslim ettiğine dair iddiasını ispat için kendisine süre verildiği Bu hücceti evvelen sâhibi isticâl edip almağın sonradan kayd olmuşdur. Oldur ki, vilâyet-i Anadolu muzâfâtından İskilib nâm kasaba sâkinlerinden işbu râfi‘ü’l-kitâb fahrü’l-müderrisîn Mevlânâ Abdurrahim b. Pîrî meclis-i şer‘-i şerîfe Dergâh-ı âlî çavuşlarından fahrü’l-akrân Mahmud Çavuş mübâşeretiyle Kalender Çavuş b. Hasan nâm kimesneyi ihzâr ve mahzarında takrîr-i kelâm edip bundan akdem mahmiye-i İstanbul’dan sılama giderken Sapancı nâm kasabaya vardıkda ben hasta olup nukūddan ve kitâbdan ve sâir esbâbdan yanımda mevcûd olan erzâkımı bir sepet ile bir garâra doldurup bu cümleyi kasaba-i Tosya’da el-Hâc Fazlullah nâm kimesneye teslîm edesiz deyû Kara Mehmed nâm mekkârî ile refîkim olan Mevlânâ İbrahim Efendi nâm kadıya teslîm etdiğimden sonra zikr olunan esbâbımı mezbûrân alıp giderlerken Gerede nâm kasaba kurbunda sâlifü’z-zikr Kalender Çavuş bi’l-külliye mezbûrlardan gasb u gāret eylemiş, hâlâ taleb ederin suâl olunsun dedikde gıbbe’s-suâl mezbûr Kalender Çavuş cevâb verip ben mezbûr Abdurrahim Efendi’nin esbâbın gasb etmedim, lâkin merkūm Abdurrahim Efendi kendi esbâbından emânet tarîkiyle bana bir sepet ile bir garâr içinde laciverd dolamalık çuka ve bir laciverd çuka ferâce ve bir alaca peşkir ve on beş zirâ‘ bez ve bir dülbend ve neftî Borlu bezi ve üç aded abdest makraması ve bir köhne dülbend örtüsü ve bir köhne sâde ve bir mor saçaklı mor çuka ve bir yeşil zenne çuka ferâce ve bir frengi saçaklı mor çuka ferâce ve bir kemhâ saçaklı laciverd çuka ferâce ve bir yeşil çuka ferâce ve on aded küçük bıçak ve iki deste tarâk ve on üç aded hoşab kaşığı ve on sekiz zirâ‘ keten bezi ve iki zirâ‘ erguvânî çuka ve dört buçuk zirâ‘ neftî çuka ve iki zirâ‘ laciverd çuka ve def‘a iki zirâ‘ laciverd çuka ve üç zirâ‘ laciverd çuka ve beş zirâ‘ laciverd çuka ve yirmi zirâ‘ laciverd çuka ve on yedi buçuk zirâ‘ beyaz aba ve on bir zirâ‘ def‘a aba ve sekiz zirâ‘ kır aba ve iki köhne kilim ve bir sepet sandığı ve iki garâr ve bir cild Tefsîr-i Kādî ve bir Vikāye ve bir Ferişteoğlu ve bir Metn-i usûlden ve bir Muhtasar ve bir cild Sarfdan ve bir cild Nahivden ve Tefsîr-i şerîfden dört cüz’ evrâk ve bir Husam-ı Kâfî ve bir Muhtasar Usûl ve bir Misbâh ve bir Mutavassıt ve bir Metn-i telhîs ve bir İmâd ve bir Hâşiye-i küçük ve bir Şerh-i akā’id ve bir Hayâlî ve bir Mirkāt ve bir Hâşiye-i Hocazâde ve bir Şahgedâ teslîm eylemiş idi. Sonra zikr olunan esbâbı geri merkūm Abdurrahim Efendi’ye bi’t-tamâm teslîm eyledim, mezkûrun bende bir habbesi kalmadı dedikde mezbûr Abdurrahim Efendi zikr olunan esbâbı kabz ve teslîmin inkâr etmeğin mezkûr Kalender Çavuş’dan sıdk-ı mekāline beyyine taleb olundukda beyyine-i âdilesi hâzır olmamağın ityân-ı beyyine için imhâl olunup vâki‘-i hâl gıbbe’t-taleb ketb olundu. Tahrîren fî evâhiri Cumâdelûlâ li sene isneteyn ve elf. Şuhûdü’l-hâl: Mevlânâ Ahmed Efendi b. Mahmud, Mehmed b. el-Hâc Mehmed, Hüsrev Çavuş [b.] Abdurrahman, Hasan Bey b. Abdullah ve gayruhüm.