Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 85 Hüküm no: 40 Orijinal metin no: [17b-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Muhallefâtına Beytülmâlce el konulan yaya Yusuf b. Abdullah’ın evinin müzâyede ile Seyyid Hasan b. Seyyid Mehmed’e satıldığı Hâric-i mahmiye-i Galata’da vâki‘ Kasımpaşa kasabası mahallâtından el-Hâc Ahmed mahallesinde bundan akdem vefât eden merhûm Yusuf b. Abdullah er-râcilin muhallefâtına vâzı‘-ı yed olan elân Atebe-i aliyyede vâki‘ râciline mahsûs beytülmâlin emîni olan kıdvetü’l-a‘yân Sefer Subaşı b. Abdülmennân âtiyyü’z-zikr menzili râfi‘-i hâze’l-kitâb Seyyid Hasan b. Seyyid Mehmed’e bey‘-i bâtt-ı sahîh ile bey‘ ettiğini ikrâr ve i‘tirâf etti. Müşterî-i mezbûr da kendi mâlıyla ve kendisi için müteveffâ-i mezkûrun muhallefâtından Beytülmâl-i mezkûra intikāl eden, mahalle-i merkūmede vâki‘, fevkānî ve tahtânî birer beyti, bahçeyi, müşterek su kuyusunu, helâyı ve avluyu hâvî olup bir taraftan Mehmed b. Sâlih mülkü, diğer taraftan Mehmed b. Pîr Mehmed mülkü, iki taraftan da tarîk-ı âm ile mahdûd bulunan cemî‘-i menzili cümle tevâbi‘ ve levâhıkı ve kâffe-i merâsim ve mürâfıkı ile râyicü’l-vakt on bir bin dokuz yüz akçe semen-i mu‘ayyen-i makbûz ile iştirâ etti. Îcâb kabûl, teslîm tesellümle akid tamâm oldu. İşbu mubâya‘a, menzil-i mezbûrun mirâren beyne’t-tâlibîn ve’r-râgıbîn müzâyede olunup semen-i mezbûrla müşterî üzerinde karâr eylemesinden sonra vâki‘ oldu. Kardeşi müşterî-i mezkûr Seyyid Hasan kıbelinden tasdîke vekîl edilen kadı Mevlâna Seyyid Hüseyin b. Seyyid Mehmed vâki‘ ikrârı vicâhen ve şifâhen tasdîk etti. Cerâ zâlike ve hurrire fi’l-yevmi’s-sâlis ve’l-ışrîn min Recebi’l-mürecceb sene isneteyn ve elf. Şuhûdü’l-hâl: Mustafa b. Hasan el-imâm, Mustafa b. Nasrullah, Haydar b. Abdullah, Mehmed b. Ahmed, Ali b. Abdullah er-râcil, Abdurrahman b. Abdullah el-hammâmî