Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 86 Hüküm no: 41 Orijinal metin no: [17b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Cebeci Hüseyin Bey’in Nuh Mehmed Bey b. Ahmed Paşa’ya sattığı incinin bedelinin borcuyla ilişkisi olduğu Dergâh-ı sa‘âdet destgâh cebecilerinden Hüseyin Bey b. İsa nâm kimesne Dergâh-ı âlî çavuşlarından fahrü’l-akrân Ramazan Çavuş mübâşeretiyle Dîvân-ı refî‘ü’l-bünyâna işbu râfi‘ü’l-kitâb kıdvetü’l-a‘yân Nuh Mehmed Bey b. Ahmed Paşa nâm kimesneyi ihzâr ve mahzarında takrîr-i kelâm edip bundan akdem mezbûr Nuh Mehmed Bey’e kırk gün va‘de ile yirmi dört bin akçeye bir tesbîh inci bey‘ eylemiş idim. Hâlâ müddet-i merkūme hulûl etmeğin meblağ-ı mezbûru taleb ederin dedikde gıbbe’s-suâl mezbûr Nuh Mehmed Bey cevâb verip sâlifü’z-zikr Hüseyin zikr olunan inciyi bana bey‘ eylediği hînde karz tarîkiyle iki yüz bin akçe bölüvermek şartıyla bey‘ edip ben dahi ol şartla iştirâ eylemiş idim. Hâlâ bana zikr olunan akçeyi bölüvermemişdir deyip sâlifü’z-zikr Hüseyin şart-ı merkūmu inkâr edip istişhâd olundukda udûl-ı Müslimînden kıdvetü erbâbi’l-iclâl usvetü ashâbi’l-ikbâl umdetü’l-havâs ve’l-mukarrebîn re’îsü’l-kā’idîn Süleyman Ağa b. Abdülmu‘în ve Mustafa Bey b. Abdullah ve Molla Mehmed b. Abdullah li ecli’ş-şehâde hâzırûn olup fi’l-vâki‘ merkūm Hüseyin zikr olunan inciyi meblağ-ı mezkûr ile merkūm Nuh Mehmed Bey’e bey‘ eyledikde karz tarîkiyle iki yüz bin akçe bölüvermek şartıyla bey‘ edip ve mezbûr dahi ol şartla iştirâ eylemişdir, biz bu husûsa şâhidleriz şehâdet dahi ederiz dediklerinde mezbûrûnun şehâdetleri ba‘de’t-ta‘dîl hayyiz-i kabûlde vâkı‘a olup kayd olundu. Tahrîren fi’l-yevmi’t-tâsi‘ aşer min şehri Receb sene isneteyn ve elf. Şuhûdü’l-hâl: Derviş Mehmed b. Hasan, İbrahim Bey b. Uğurlu, Ahmed b. Abdullah el-muhzır, Ahmed b. Hüseyin el-muhzır ve gayruhüm.