Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 92 Hüküm no: 52 Orijinal metin no: [19b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çavuş’un vefat eden sakabaşı Ahmed Ağa’nın oğlundan satın aldığı ev ve tasarruf hakkını devraldığı tarlalar hususunda hak iddia eden Hüseyin Bey’in müdâhalesinin önlenmesi Oldur ki, Mahmiye-i Kostantıniyye mahallâtından Mimar Sinan mahallesinde sâkin işbu râfi‘ü’l-kitâb Mehmed Çavuş b. Abdullah nâm kimesne meclis-i şer‘-i refî‘ü’l-bünyâna Dergâh-ı âlî müteferrikalarından Hüseyin Bey b. Abdullah nâm kimesneyi ihzâr ve mahzarında takrîr-i kelâm edip bundan akdem vefât eden merhûm sakabaşı Ahmed Ağa’nın Terkos nâhiyesinde Çilingir nâm karyede vâki‘ inde’l-ahâlî ma‘lûmetü’l-hudûd olan mülk menzilini ve bağ ve bağçesin sulbî oğlu ve vârisi olan Mahmud Çelebi’den otuz altı bin akçeye iştirâ edip ve geri karye-i mezbûre sınırında vâki‘ olan inde’l-ahâlî ma‘lûmetü’l-hudûd olan on altı kıt‘a tarlasının hakk-ı tasarrufun sâhib-i arz ma‘rifetiyle üç bin akçeye tefvîz edip mezbûr Mahmud Çelebi’ye zikr olunan bey‘ ve tefvîzi mukābelesinde cem‘an otuz dokuz bin akçe teslîm edip çiftlik-i mezbûr ile’l-ân benim tasarrufumda iken hâlâ mezbûr Hüseyin Bey zikr olunan akārâtı bî-vechin tasarruf edip benim tasarrufuma mâni‘ olur suâl olunsun dedikde, gıbbe’s-suâl mezkûr Hüseyin Bey cevâb verip, fi’l-vâki‘ müteveffânın oğlu merkūm Mahmud Çelebi zikr olunan akārâtı merkūm Mehmed Çavuş’a vech-i meşrûh üzre bey‘ ve tefvîz eylemişidi. Lâkin ba‘dehû müteveffânın sulbiye ve kebîre kızları Kerime ve Ayşe ve zevci Sitti Hâtun bt. Abdullah zikr olunan çiftliği bana satmışlardır deyû merkūm Mahmud Çelebi’nin bey‘ ve tefvîzini i‘tirâf etdikde zikr olunan tarlalar kızlara ve zevceye intikāl etmeyip mezbûrelerin kat‘an medhalleri olmamağın merkūm Mehmed Çavuş’a kıbel-i şer‘-i şerîfden zikr olunan tarlaların cümlesini ve mülk olan bağ ve bağçe ve menzilden merkūm Mahmud Çelebi’nin hisse-i şâyi‘asın zabta tenbîh olunup vâki‘-i [hâl] bi’t-taleb ketb olunup yed-i tâlibe vaz‘ olundu. Fî evâhiri Şa‘bân sene-i m[ezkûr]. Şuhûdü’l-hâl: Ahmed b. Hüseyin, Hüseyin b. Abdullah, Kasım b. Abdullah, İbrahim b. Arslan ve gayruhüm.