Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 94 Hüküm no: 54 Orijinal metin no: [20a-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Doğancılar zümresinden Mustafa Bey b. Abdüşşekûr’un on beş bin akçesini vakfettiği Elhamdülillâh…. Ammâ ba‘d; işbu mazmûnunda vakıf ikrârından bahseden kitâb-ı sahîh-i şer‘î ve sakk-i sarîh-i mer‘îdir. Sultân-i a‘zam hâkān-ı mu‘azzam…. Es-sultân b. es-Sultân es-Sultân Murad Hân b. es-Sultân Selim Hân - ebbedallâhu iyyâhüm saltanatehu’z-zâhire ilâ intihâi’z-zamân- cenâbından aşağıdaki husûsa memûr edilen umdetü’l-emâcid ve’l-ekârim sâhibü’l-mefâhir ve’l-mekârim kıdvetü’l-havâs vel-mukarrebîn Kilercibaşı Hüsrev Ağa b. Abdülmu‘în kıbelinden husûs-i âtiyyü’l-beyâna vekîl edilen mefharü’l-a‘yân bevvâb-ı sultânî Davud Bey b. Abdülmennân meclis-i şerî‘at-i garrâ ve mahfil-i tarîkat-i zehrâda hâzır olup, âtiyyü’z-zikr vakfa mütevellî olan kıdvetü’l-ekârim Hazîne-i âmire Kethüdâsı Osman Ağa b. Abdülmennân kıbelinden ikrâr-ı mezkûru tasdîke vekîl edilen fahrü’l-emsâl ve’l-eşbâh bevvâb-ı sultânî Durmuş Ağa b. Abdullah mahzarında şöyle ikrâr ve i‘tirâf etti ki, cihet-i verâseti Sultân-ı mezkûra münhasır olan, hâssa doğancıları zümresinden merhûm-i mebrûr Mustafa Bey b. Abdüşşekûr, hâl-i hayâtında ve nefâz-i tasarrufâtında dâr-ı fenâdan dâr-ı karâra irtihâl ettiğinde geride bıraktığı on beş bin akçenin mu‘tâdı üzre murâbaha-i sahîha yapılmak üzre vakfedilmesini vasiyyet etti. Rıbhdan Allah’ın nâsib ettiğini Hızâne-i âmire-i sultâniye li-hulûdi’d-devleti’l-hâkāniyyede eczâ-i şerîfe kırâ’at olunurken yakılan şem‘-i asel için sarf edilmesini şart etti. Tevliye-i hasbiyyeyi de Hazîne-i hâssa-i hâkāniyye hizmetindeki kimesnelere kethüdâlık etmeye memûr olan kimesneye şart etti. Nezâret-i hasbiyyeyi de Hazîne-i âmire reisine şart etti. Sultân-ı muşârun ileyh -en‘amallâhu te‘âlâ ileyhi- tarafından kabûl olunup izin verildi. Vâki‘ ikrâr vekîl-i mezbûr tarafından tasdîk edildi. Meblağ-ı mezbûr bu sûretle müseccel, lâzım, müebbed bir vakıf oldu. Cerâ fî evâsıtı Şa‘bân sene isneteyn ve elf. Şuhûdü’l-hâl: Osman Ağa kethüdâ-i kiler, Hasan Ağa kâtib-i Hazîne, Ömer Ağa kâtib, Mehmed Ağa el-Çerkezî, Hüsrev Çavuş [b.] Abdülmennân, Davud Bey [b.] Abdullah bevvâb, Perviz Bey [b.] Abdullah bevvâb, Hamza b. Abdullah bevvâb, Mustafa Bey [b.] Mehmed, Ahmed b. İbrahim ve gayruhüm