Bab Mahkemesi 54 Numaralı Sicil (H. 1102 / M. 1691) cilt: 20, sayfa: 159 Hüküm no: 160 Orijinal metin no: [25b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Çelebi b. Rezzak’ın üzerine oğlu Mustafa için nafaka takdiri Dârü’l-hilâfeti’l-aliyyeti’l-Osmaniyye Kostantıniyye el-mahmiye mahallâ­tından Akşemseddin mahallesi sâkinelerinden olup, zâtını ma‘rifet-i şer‘iyye ile ârifân olan Yusuf Efendi b. Abdurrahman ve Mustafa Çelebi b. Mehmed ta‘rîfleriyle mu‘arrefe olan Rahime bt. Mehmed nâm hâtun meclis-i şer‘-i şerîf-i enverde, sâbıkan zevci olan Ahmed Çelebi b. Rezzak mahzarında ikrâr ve takrîr-i kelâm ve ta‘bîr ani’l-merâm edip, zevcim mezkûrun firâşından hâsıl ve benden mütevellid bi hakkı’l-hidâne hacr ve terbiyemde olan işbu sagīr oğlum Mustafa’nın nafaka ve sâir levâzım ve mühimmesi için babası mezbûr üzerine kadr-i ma‘rûf nafaka farz ve takdîr olunmak matlûbumdur dedikde, hâkim-i muvakki‘-i sadr-ı kitâb -tûbâ lehû ve hüsnü me’âb- hazretleri dahi sagīr-i mezbûrun nafaka ve sâir levâzım-ı mühimmesi için târih-i kitâbdan beher yevm babası mezbûr üzerine bi’t-terâzî altışar akçe farz ve takdîr edip, meblağ-ı mefrûz-ı mezbûru sagīr-i mezbûrun nafaka ve sâir levâzım-ı zarûriyyesine harc ve sarfa ve lede’l-iktizâ istidâneye ve inde’z-zafer babası mezbûr üzerine rücû‘a merkūme Rahime’ye izin vermeğin, mâ hüve’l-vâki‘ bi’t-taleb ketb olundu. Fi’l-yevmi’l-ışrîn min Cemâziyelevvel sene 1102. Şuhûdü’l-hâl: Mustafa Efendi b. Mehmed, Yusuf Çelebi b. Abdurrahman, Mustafa Çelebi b. Ömer, İbrahim Çelebi b. Ahmed, Ahmed Çelebi b. Ahmed.