Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 99 Hüküm no: 61 Orijinal metin no: [21a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Tacir Hüsrev’in devlete olan borcu yüzünden Selânik’ten gelen aba kumaşına başbâkî defterdârınca el konulduğu, bunun bir bölümünün el-Hâc Abdi’ye ait olduğunun anlaşıldığı Yoros kazâsına tâbi‘ Beykozu nâm karye sâkinlerinden işbu râfi‘ü’l-kitâb el-Hâc Abdi b. Abdullah nâm kimesne Dîvân-ı refî‘ü’l-bünyâna hâzır olup, hâlâ atabe-i aliyyede Hızâne-i âmirenin başbâkī defterdârı olan umdetü’l-emâcidi’l-kirâm Hasan Efendi’nin huzûr-ı me‘âlî-i mevfûrlarında takrîr-i kelâm edip bundan akdem Hüsrev b. Abdullah nâm tâcir mahrûsa-i Selânik’e gitdikde Usturumca abasından üç denk beyaz aba alıp bana gönderesin deyû emânet tarîki ile merkūma yirmi bir bin akçe teslîm edip ba‘dehû merkūm Hüsrev Selânik’den zikr olunan akçem ile üç denk aba alıp ve on dokuz denk aba kendi mâlıyla alıp cem‘an yirmi iki denk abayı benim için el-Hâc Abdi’ye teslîm edesin deyû Yelkovan dimekle ma‘rûf Ali Reis nâm mellâha emâneten teslîm edip hâlâ mezkûr Ali Reis abayı bundan getirdikde sâlifü’z-zikr Hüsrev’in mîrîye deyni olmağın, müşârun-ileyh defterdâr efendi zikr olunan yirmi iki denk abanın cümlesin mezbûr Hüsrev’indir deyû mîrî için zabt etmek isterler dedikde, gıbbe’s-suâl müşârun-ileyh Hasan Efendi fi’l-vâki‘ zikr olunan üç denk aba merkūm el-Hâc Abdi’nin idiği ma‘lûmum değildir dedikde, vâzı‘u’l-yed olan emîn-i mezbûr Ali Reis ihzâr olunup bi’l-muvâcehe suâl olundukda cevâb verip fi’l-vâki‘ merkūm Hüsrev zikr olunan yirmi iki denk abayı Selânik’de bana emâneten teslîm eyledikde, işbu on dokuz denk aba benimdir ve bu üç denk aba merkūm el-Hâc Abdi’nin mülk-i mahzı ve hakk-ı hâlisidir, bu üç denk abayı sâhibi olan mezkûr el-Hâc Abdi’ye teslîm edesin deyû ısmarlayıp bana bu minvâl üzre teslîm eylemişdir deyû bi’l-muvâcehe haber vermeğin cânib-i şer‘-i mutahhardan mûmâ-ileyh defterdâr efendi merkūm el-Hâc Abdi’nin üç denk abasına ta‘arruzdan men‘ olunup vâki‘-i hâl gıbbe’s-suâl ketb olundu. Tahrîren fi’l-yevmi’r-râbi‘ ve’l-ışrîn min Şa‘bân sene isneteyn ve elf. Şuhûdü’l-hâl: Rüstem b. Abdullah, Hacı Sefer b. Abdullah, Hacı Abdi el-mellâh, Mehmed b. Şücâ‘, Hasan b. Abdullah ve gayruhüm.