Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 101 Hüküm no: 64 Orijinal metin no: [21b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Temenna bt. Abdullah’ın Zamâne bt. Abdullah’a ev satışından kalan borcunu ödemesi Oldur ki, mahmiye-i Kostantıniyye mahallâtından İshak (…) [Çelebi] mahallesinde sâkine işbu râfi‘atü’l-kitâb Zamâne bt. Abdullah nâm hâtun meclis-i şer‘-i refî‘ü’l-bünyâna Temenna bt. Abdullah nâm hâtunu ihzâr ve mahzarında takrîr-i kelâm edip bundan akdem kasaba-i hazret-i Ebî Eyyûb Ensârî mahallâtından Çavuş Kasım mahallesinde vâki‘ lede’l-ahâlî ma‘lûmetü’l-hudûd olan mülk menzilim merkūme Temenna Hâtun’a ma‘rifet-i hâkimü’l-vakt ile sekiz bin akçeye bey‘-i bât ile bey‘ edip ba‘dehû beş bin beş yüz akçesin mezbûre Temenna yedinden kabz edip zimmetin meblağ-ı mezkûrdan iki bin beş yüz akçe hakkım bâkī kalmışdı. Hâlâ bâkī-i mezbûru taleb ederin suâl olunsun dedikde, gıbbe’s-suâl mezbûre Temenna kaziyye minvâl-i meşrûh üzre idiğin i‘tirâf edip lâkin menzil-i mezkûrun vakf idiğine bey‘-i mezbûrdan mu’ahhar sene isneteyn ve elf Cemâziyelâhire’si târihi ile müverrah iki şahsın semâ‘lı şehâdetlerin müştemil hüccet ibrâz edip lâkin mazmûnunda şehâdet eden kimesneler vâkıf ve mevkūfun-aleyhi bilmeyip ve tarîk-i tescîle şu‘ûrları olmayıp lüzûm-ı vakfa delâlet eder temessük-i şer‘î olmayıp ve menzil-i mezbûr nice müddet mülkiyyet üzre ma‘rifet-i hâkim ile bey‘ ve iştirâ olunup bey‘ sahîh idiğini müştemil müte‘addid mülkiyyet hüccetleri olup vakf lâzım olduğun ve yâhûd vakf kadîm olup ile’l-ân vakfiyet üzre tasarruf olunageldiğin bilir kimesne zâhir olmamağın merkūme Temenna Hâtun’a cânib-i şer‘-i mutahhardan bâkī kalan iki bin beş yüz akçeyi bâyi‘a-i mezkûre Zamâne’ye teslîm için tenbîh olunup mâ vaka‘a kayd olundu. Fî evâhiri Şa‘bân sene isneteyn ve elf. Şuhûdü’l-hâl: Hasan b. Abdullah, Mustafa b. Osman, Ahmed b. Hüseyin, Yusuf [b.] Abdullah, Davud b. Abdullah, Ahmed b. Abdullah, el-Hâc Mustafa b. Cârullah, Bekir Halîfe el-mü’ezzin, Hasan Çelebi b. Murad Efendi ve gayruhüm.