Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 104 Hüküm no: 70 Orijinal metin no: [22b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sekbân Kara Ali Evkâfı mütevellisi Cafer b. Abdullah’ın vakfın Receb Çelebi b. Musa’daki emanetini alması Oldur ki, Mahmiye-i Kostantıniyye’de vâki‘ merhûm Sekbân Kara Ali Evkāfı’na hâlâ utekāsından meşrûtiyyet üzre mütevellî olan Cafer b. Abdullah nâm kimesne meclis-i şer‘-i refî‘ü’l-bünyâna hâzır olup Kethüdâ Hâtun mahallesinde sâkin işbu râfi‘ü’l-kitâb Receb Çelebi b. Musa nâm kimesne mahzarında takrîr-i kelâm edip bundan mukaddem evkāf-ı mezkûreye berât-ı hümâyûnla mütevellî olan Davud b. Abdullah nâm kimesne evkāf-ı mezbûreden Karagümrük mahallesinde vâki‘ lede’l-ahâlî ma‘lûmetü’l-hudûd bir bâb nalband dükkânı Mahmud nâm müste’cir-i müteveffâ mahlûlünden el-Hâc Kasım b. Abdullah nâm na‘âle icâreye verip mezbûr el-Hâc Kasım’dan ücret-i mu‘accele tarîki üzre vakf için on sekiz bin yüz akçe alıp meblağ-ı mezbûru sâlifü’z-zikr Receb Çelebi’de emânet vaz‘ etmiş imiş, hâlâ ben meblağ-ı mezkûru mesfûr Receb Çelebi yedinden tevliyetim hasebiyle vakf-ı mezbûr için bi’t-tamâm alıp kabz edip meblağ-ı mezkûrdan merkūm Receb Çelebi yedinde bir akçe ve bir habbe bâkī kalmadı dedikde mütevellî-i mezkûrun vech-i meşrûh üzre olan ikrâr ve i‘tirâfın mesfûr Receb Çelebi vicâhen tasdîk ve şifâhen tahkīk edip vâki‘-i hâl gıbbe’s-suâl ketb olundu. Fî evâili Ramazan sene-i mezbûre. Şuhûdü’l-hâl: El-Hâc Davud b. Mehmed el-imâm, Pervâne Hoca b. Abdullah el-mü’ezzin, Yakub b. Abdullah, Maksud b. Abdullah, Ali b. Sinan, Çolak Mustafa b. Mehmed, Musa b. Abdullah korucu, Mustafa b. Himmet el-muhzır, el-Hâc Haydar [b.] Abdullah el-bakkal, Mahmud Çelebi b. Mehmed ve gayruhüm.