Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 106 Hüküm no: 73 Orijinal metin no: [22b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüsrev Çavuş b. Abdullah’ın Mehmed b. Mahmud’tan hile yoluyla aldığı parayı ödemesi Oldur ki, medîne-i Erzurum ahâlîsinden işbu râfi‘ü’l-kitâb Bölükbaşı dimekle ma‘rûf Mehmed b. Mahmud nâm kimesne meclis-i şer‘-i refî‘ü’l-erkâna Dergâh-ı sa‘âdet destgâh çavuşlarından fahrü’l-akrân İbrahim Çavuş mübâşeretiyle Hüsrev Çavuş b. Abdullah nâm kimesneyi ihzâr ve mahzarında takrîr-i kelâm edip bundan akdem belde-i Malatya ahâlîsinden Mustafa b. Mahmud ve Ahmed b. Mahmud ve Halil b. Mustafa nâm kimesneler emâneten bana seksen dört bin akçe teslîm edip dâr-ı mahmiye-i İstanbul’da merkūm Hüsrev Çavuş’da bizim rehin tarîkiyle vaz‘ olunmuş bir çift la‘l küpemiz vardır, anı ahz edip meblağ-ı mezbûru merkūma teslîm eyle, eğer ki rehn-i mezbûru sana teslîm etmezse meblağ-ı merkūmu mezbûra teslîm etmeyip geri bize getir deyû ısmarladıkları ecilden, ben dahi meblağ-ı merkūmu bunda getirip sâlifü’z-zikr Hüsrev Çavuş’dan rehn-i mezbûru taleb eylediğimde rehni bana teslîm etmedin, hîle ile meblağ-ı mezbûru benden alıp hâlâ küpeyi bana teslîm etmeyip satdım deyû cevâb vermeğin, benden aldığı meblağı taleb iderin dedikde gıbbe’s-suâl merkūm Hüsrev Çavuş meblağ-ı mezbûru emîn-i mezkûr Mehmed yedinden minhâc-ı mastûr üzre bi’t-tamâm kabz eylediğin tav‘an i‘tirâf edip ve zikr olunan küpeyi satdım deyû teslîmden imtinâ‘ etmeğin meblağ-ı mezbûr seksen dört bin akçeyi emîn-i mesfûr Mehmed’e bi’t-tamâm teslîm için kıbel-i şer‘-i mutahhardan sâlifü’z-zikr Hüsrev Çavuş’a tenbîh olunup vâki‘-i hâl gıbbe’s-suâl ketb olundu. Tahrîren fî evâili Ramazan sene-i mezbûre. Şuhûdü’l-hâl: Osman [b.] Abdullah el-bevvâb, Ahmed b. İdris m[ezbûr, (el-bevvâb)], Mustafa [b.] Abdi, Ahmed b. Abdullah m[ezbûr], Hızır b. Abdullah m[ezbûr]. ve gayruhüm.