Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 106 Hüküm no: 72 Orijinal metin no: [22b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yine Bayezid Subaşı’nın vefat eden Hasan’ın Mehmed Bey’de kalan eşyalarını teslim aldığı Oldur ki, Atebe-i aliyyede vâki‘ acemi oğlanları zümresinin hâlâ beytülmâl emîni olup müteveffâ-yı âti’z-zikrin muhallefâtına vâzı‘u’l-yed olan fahrü’l-akrân Bayezid Subaşı b. Abdülmennân meclis-i şer‘-i refî‘ü’l-bünyâna hâzır olup sene ihdâ ve elf’de vâcib Karaferye cizyesin cem‘a me’mûr olan işbu râfi‘ü’l-kitâb Mehmed Bey [b.] Sinan nâm silahdâr mahzarında takrîr-i kelâm edip bundan [akdem] zümre-i merkūmede ikinci cemâ‘atden merhûm Hasan b. Abdullah nâm acemi oğlanı merkūm Mehmed Bey ile Karaferye’ye bile gidip anda vefât eyledikde, yanında mevcûd olan esbâbından bir yüklük ve bir Dımeşkî sâde kılıç ve bir kürklü yeşil ferâce ve iki köhne yelek ve bir muhattem yeşil kuşak ve bir binlik çukadan yağmurluk ve bir rikābıyla bir sâde eyer ve bir sâde oyan ve birkaç ok ve bir yay işbu zikr olunan esbâbı sâlifü’z-zikr Mehmed Bey mezbûr Hasan’ın hîn-i vefâtında emâneten kabz u zabt eylemiş, hâlâ getirip bi’t-tamâm bana teslîm edip ben dahi emânetim hasebiyle beytülmâl için zikr olunan esbâbı merkūm Mehmed Bey yedinden bi’t-tamâm kabz ve tesellüm eyledim dedikde emîn-i merkūmun vech-i meşrûh üzre olan ikrâr ve i‘tirâfın sâlifü’z-zikr Mehmed Bey vicâhen tasdîk ve şifâhen tahkīk edip vâki‘-i hâl gıbbe’s-suâl ketb olundu. Fi’t-târihi’l-mezbûr. Şuhûdü’l-hâl: Es-Sâbikūn.