Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 110 Hüküm no: 78 Orijinal metin no: [23b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Todori v. Yani’nin alacaklı olduğu eski Boğdan voyvodasından parayı almak üzere vekil tayin ettiği Cebeci Osman ile olan anlaşmazlığında sulh olduğu Mahmiye-i Kostantıniyye mahallâtından Fenerkapısı dâhilinde Patrikân mahallesinde sâkin Todori v. Yani nâm zimmî meclis-i şer‘-i refî‘ü’l-bünyâna hâzır olup Dergâh-ı âlî cebecilerinden Osman b. Abdullah nâm kimesne mahzarında takrîr-i kelâm edip bundan akdem vilâyet-i Boğdan voyvodası olan Aron voyvoda nâm zimmîye karz tarîkiyle kendi mâlımdan üç yüz yetmiş bin akçe teslîm edip ba‘dehû meblağ-ı mezbûru kabz ve îsâle kendi kıbelimden merkūm Osman’ı tevkîl edip mezbûr dahi vekâleti hasebiyle merkūm Aron voyvoda yedinden meblağ-ı mezbûrun elli altı bin beş yüz akçesin kabz edip lâkin bana getirip teslîm etmemeğin meblağ-ı mezbûru taleb eylediğimde yol harcına ve sâir levâzıma gitti deyip mâ-beynimizde nice nizâ‘ vâki‘ olmuş idi. Hâlâ muslihûn tavassut etmeğin on yedi bin akçeye sulh olup bedel-i sulh olan on yedi bin akçeden beş bin akçesin mezbûr Osman yedinden kabz eyledim dedikde mukırr-ı mezbûrun ikrâr-ı meşrûhun sâlifü’z-zikr Osman vicâhen tasdîk ve şifâhen tahkīk edip vâki‘-i hâl bi’t-taleb ketb olundu. Tahrîren fi’l-yevmi’s-sâlis min şehri Şa‘bâni’l-mu‘azzam sene isneteyn ve elf. Şuhûdü’l-hâl: Abidin Çavuş b. Abdullah el-mübâşir, Haydar Çavuş b. Abdullah, Mehmed b. Abdullah er-râcil, Hasan b. Abdullah er-râcil, Mehmed Çelebi b. Balaban er-râcil, Veli Bey b. Abdullah er-râcil, Mustafa b. Ferhad er-râcil.