Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 112 Hüküm no: 82 Orijinal metin no: [24a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ferruhşad bt. Abdullah’ın, kızı Fâtıma bt. Abdullah’ın tasarrufunda olan evde hissesinin olmadığının tesbiti Mahmiye-i Kostantıniyye mahallâtından Debbâğ Yunus mahallesinde sâkine Ferruhşad bt. Abdullah nâm hâtun meclis-i şer‘-i refî‘ü’l-erkâna mahalle-i mezbûrede sâkine işbu sâhibetü’l-kitâb Fâtıma bt. Abdullah nâm hâtunun zevci ve husûs-ı âti’z-zikre vekîl-i şer‘îsi olan Ferhad Bey b. Abdullah nâm kimesneyi ihzâr ve mahzarında takrîr-i da‘vâ edip bundan akdem seyyidim olup vefât eden merhûm Cafer Bey’in muhallefâtından mahalle-i mezbûrede vâki‘ lede’l-ahâlî ma‘lûmetü’l-hudûd bir menzil benden Fâtıma nâm sagīresiyle ümm-i veled-i uhrâsı Şâkire’den Mehmed nâm sagīrine irs-i şer‘le intikāl edip ba‘dehû kızım mezkûre Fâtıma vefât etmekle menzil-i mezbûrdan kendiye âide olan sülüs hisseden sülüs-i şâyi‘i bana intikāl edip bâkīsini ammîleri oğlu olmak da‘vâ edenler almış idi. Hâlâ zikr olunan menzili merkūme Fâtıma tasarruf edip, beni zikr olunan hissemi tasarrufdan men‘ eder suâl olunsun dedikde, gıbbe’s-suâl vekîl-i merkūm cevâb verip fi’l-vâki‘ sâbıkda mezkûre Ferruhşad’ın menzil-i mezkûrda kızı Fâtıma’ya intikāl eden sülüs hisseden sülüs hissesi var idi. Lâkin sonra sâir verese menzil-i mezkûrdan hisselerin bey‘ eylediklerinde merkūme Ferruhşad dahi zikr olunan hisse-i ma‘lûmesin rızâsıyla beş bin akçeye bey‘ edip semen-i mezkûru kabz eyleyip menzil-i mezbûrda kat‘an alâkası kalmamışdır dedikde, mezkûre Ferruhşad bey‘ini inkâr edip istişhâd olundukda udûl-ı Müslimînden Mevlânâ Mustafa b. Mehmed el-imâm ve Abdüllatîf b. Hüsam el-mü’ezzin ve Mahmud b. Hoca Pîrî ve el-Hâc Ali b. Yusuf ve İsa b. Veli nâm kimesneler li ecli’ş-şehâde hâzırûn olup fi’l-vâki‘ merkūme Ferruhşad menzil-i mezkûrdan kendiye kızından intikāl eden hisse-i şâyi‘a-i ma‘lûmesin rızâsıyla beş bin akçeye bey‘ edip semen-i mezkûru bizim huzûrumuzda kabz eylemişdir. Biz bu husûsa şâhidleriz şehâdet dahi ederiz dediklerinde, mezbûrûnun şehâdetleri ba‘de’t-ta‘dîl hayyiz-i kabûlde vâkı‘a olup merkūme Ferruhşad da‘vâdan men‘ olundukda vâki‘-i hâl bi’t-taleb ketb olundu. Tahrîren fi’l-yevmi’s-sâlis ve’l-ışrîn min Recebi’l-mübârek li sene isneteyn ve elf. Şuhûdü’l-hâl: El-Hâc Ahmed b. Ahmed, Mustafa b. Derviş, Hüseyin b. Abdullah, Keyvan b. Abdullah.