Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 113 Hüküm no: 83 Orijinal metin no: [24b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin Çavuş b. Nuh’un timarını Receb Çavuş b. Abdurrahman’a ferâğ edip çiftliğiyle değiştiği, sonra çiftliği iade ederek devrettiği timarın bedelini alacak kabul ettiği Dergâh-ı âlî çavuşlarından fahrü’l-akrân Hüseyin Çavuş b. Nuh nâm kimesne meclis-i şer‘-i refî‘ü’l-erkâna hâzır olup işbu râfi‘ü’l-kitâb mefharü’l-emsâl Receb Çavuş b. Abdurrahman mahzarında takrîr-i kelâm edip bundan akdem Bolu sancağında Amasra nâhiyesinde Canik ve Ömerler nâm karye ve gayrıdan berât-ı hümâyûnla taht-ı tasarrufumda olan on beş bin akçelik timarımı mezbûr Receb Çavuş’a ferâğ edip mezbûr dahi bu mukābelede Silivri muzâfâtından Simidli nâm karyede vâki‘ olup Cebecibaşı Arpalığı dimekle ma‘rûf mülknâmesinde tafsîl olunduğu üzre çiftliğini cemî‘-i tevâbi‘ ve levâhıkıyla ve altmış re’s sığırıyla bana teslîm edip ben dahi kabûl eylemiş idim. Hâlâ ikimiz dahi hüsn-i rızâmız ile ibdâl-ı mezbûrdan rücû‘ edip timar-ı mezbûru geri deyn kabûl edip çiftlik-i merkūmu cemî‘-i tevâbi‘ ve levâhıkıyla ve altmış re’s dava[rı] mezkûr Receb Çavuş’a teslîm edip mezbûr dahi çiftlik-i mezbûru rızâsıyla geri kabûl ve tesellüm eyledi dedikde, mukırr-ı mezbûrun vech-i meşrûh üzre olan cemî‘ kelimâtın mesfûr Receb Çavuş vicâhen tasdîk ve şifâhen tahkīk edip vâki‘-i hâl gıbbe’s-suâl ketb olundu. Tahrîren fi’l-yevmi’s-sâbi‘ min Şa‘bâni’l-mu‘azzam sene isneteyn ve elf. Şuhûdü’l-hâl: Kıdvetü’l-a‘yân Süleyman Ağa b. Abdülmennân re’îsü’l-kā’idîn, Nurullah Çavuş el-kā’idü’l-sultânî, Hasan Çavuş Hızır Paşavî, Nesimî Çavuş el-kā’idü’s-sultânî, Ömer Çavuş re’îsü’l-muhzırîn sâbıkan, Mustafa Çavuş el-kā’id, Durak Bey el-cündî, Hasan b. Abdullah el-muhzır ve gayruhüm.