Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 114 Hüküm no: 85 Orijinal metin no: [24b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rüstem Ağa b. Abdullah’ın, komşusu Şemsimah bt. Abdullah’ın evini Rıdvan bt. Abdullah’a satması üzerine şuf‘a talep etmesi Mahmiye-i Kostantıniyye mahallâtından Edirnekapısı kurbunda merhûm Ali Paşa mahallesinde sâkin işbu râfi‘ü’l-kitâb fahrü’l-akrân Rüstem Ağa b. Abdullah ez-zevvâku’s-sultânî meclis-i şer‘-i refî‘ü’l-erkâna mahalle-i mezbûrede sâkine Şemsimâh bt. Abdullah ve Rıdvan bt. Abdullah nâm hâtunları ihzâr ve mahzarlarında takrîr-i kelâm edip bundan akdem mezbûre Şemsimâh Hâtun mahalle-i merkūmede vâki‘ lede’l-ahâlî ma‘lûmetü’l-hudûd olup benim mülk menzilime muttasıl olan menzilini cemî‘-i tevâbi‘ ve levâhıkıyla mezbûre Rıdvan Hâtun’a otuz bin akçeye bey‘ edip ba‘dehû bey‘-i mezbûru ben işittiğim hînde sükût etmeyip şuf‘a taleb edip hâzır olanları işhâd etmişdim. Hâlâ mezkûre Şemsimâh Hâtun hîn-i bey‘de senin menziline muttasıl olan yerin bir zirâ‘ını bey‘ eylemiş idim deyû ıskāt-ı şuf‘a için hilâf-ı vâki‘ te‘allül eder suâl olunsun dedikde, gıbbe’s-suâl merkūme Şemsimâh fi’l-vâki‘ hîn-i bey‘de zikr olunan menzilin müdde‘iyenin menziline muttasıl olan yerinden bir zirâ‘ını bey‘ eylemiş idim deyüp cemî‘-i tevâbi‘ ve levâhıkı bey‘ini inkâr edip istişhâd olundukda, hîn-i bey‘de hâzır olan udûl-ı Müslimînden Mustafa b. Sinan el-mü’ezzin ve Ahmed b. Abdullah el-a‘ser ve Ali b. Osman ve Ahmed b. Mustafa nâm kimesneler li ecli’ş-şehâde hâzırûn olup fi’l-hakīka mezbûre Şemsimâh Hâtun menzil-i mezbûru sâlifü’z-zikr Rıdvan Hâtun’a bey‘ eylediği hînde [25a] zikr olunan zirâ‘ı alıkomayıp mahdûd-ı mezkûru cemî‘-i tevâbi‘ ve levâhıkıyla otuz bin akçeye bey‘ eylemişdir ve müdde‘î-i mezbûr istediği gibi şefî‘ini taleb ederin deyû menzil-i mezbûr önünde bizi işhâd etmişdir. Biz bu husûsa şâhidleriz şehâdet dahi ederiz dediklerinde, mezbûrûnun şehâdetleri ba‘de’t-ta‘dîl hayyiz-i kabûlde vâkı‘a olup mâ hüve’l-vâki‘ bi’t-taleb ketb olundu. Tahrîren fi’l-yevmi’r-râbi‘ min Şa‘bân sene isneteyn ve elf. Şuhûdü’l-hâl: Abdi Çavuş b. Ebubekir el-mübâşir, Abdi b. İbrahim, Rıdvan Bey b. Abdullah ez-za‘îm, Ahmed b. Abdullah el-imâm, Mustafa b. İbrahim el-mü’ezzin.