Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 115 Hüküm no: 86 Orijinal metin no: [25a-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Beytülmâl tarafından zabt edilen Sinan b. Abdullah’ın evinin müzâyede ile Fâtıma Hatun bt. el-Hâc Veli’ye satıldığı Mahrûse-i Galata kazâsı nâhiyelerinden İstinye nâhiyesinde vâki‘ Beydere karyesinde bundan akdem fevt olan yirmi altıncı bölük yayalarından merhûm Sinan b. Abdullah nâm râcilin muhallefâtına vâzı‘-ı yed olan Atebe-i aliyye ve südde-i seniyyede vâki‘ râcilin tâifesi beytülmâlinin emîni kıdvetü’l-a‘yân Sefer Subaşı b. Abdülmennân meclis-i şer‘-i şerîfde hâzır olup, âtiyyü’z-zikr menzili hâmile-i hâze’l-kitâb Fâtıma Hâtun bt. el-Hâc Veli nâm hâtuna emânet-i mahkiyyesi hasebiyle bey‘-i bâtt-ı sahîh ile bey‘ ettiğini ikrâr ve i‘tirâf etti. Mezbûre Fâtıma Hâtun da kendi mâlıyla kendisi için, beytülmâl-i mezkûra müteveffâ-i merkūmdan intikāl eden, karye-i merkūmede vâki‘, fevkānî ve tahtânî birer beyti, selâmlığı, fırını, ahırı ve avluyu hâvî, bir taraftan Ahmed Çavuş b. Nasuh mülkü, diğer taraftan müşteriyye-i mersûme mülkü, öteki taraftan deniz ve diğer taraftan da tarîk-ı âm ile mahdûd menzili cümle tevâbi‘ ve kâffe-i merâsim ve mürâfıkı ile râyicü’l-vakt yedi bin beş yüz akçe semen-i mu‘ayyen-i makbûz ile iştirâ etti. Îcâb kabûl ve teslîm tesellümle akid tamâm oldu. İşbu mubâya‘a, menzil-i mezbûrun mirâren beyne’t-tâlibîn ve’r-râgıbîn müzâyede olunup semen-i mezbûrla müşterî üzerinde karâr eylemesinden sonra vâki‘ oldu. Vâki‘ ikrâr, müşteriyye-i mezkûre tarafından vicâhen ve şifâhen tasdîk edildi. Cerâ zâlike ve hurrire fi’l-yevmi’t-tâsi‘ min Şa‘bân sene isneteyn ve elf. Şuhûdü’l-hâl: Mehmed b. Bâli el-hatîb, Mehmed b. Yusuf el-müezzin, Mahmud b. Mehmed er-râcil, Mehmed b. Mehmed acemi oğlanı, Hızır b. Abdullah er-râcil, Ali b. Abdullah er-râcil, Pervâne b. Abdullah korucu, Şaban b. Mehmed el-cündî, İbrahim Çavuş b. Mustafa, Muharrem b. Abdullah, Beşir b. Musa üstâd-ı bahçe-i hâssa, Eynehan b. Abdullah üstâd-ı bahçe-i hâssa