Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 120 Hüküm no: 94 Orijinal metin no: [26a-3, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Merhûm Abdülmuhyi Efendi’nin Ayasofya yakınında bulunan evini sağlığında büyük kızı Emine’ye bağışladığı Udûlden Mevlâna Mehmed Çelebi b. İskender el-kādî ve İbrahim Çelebi b. Mustafa nâm kimesneler Dîvân-ı âlî’de vüzerâ-i kirâm ve hulefâ-i izâm huzûrunda, merhûm-i mebrûr ed-dâric ilâ medârici rahmeti rabbihi’l-gafûr Abdülmuhyî Efendi el-muvakki‘ el-menşûrun Abdülhamid, Fâtıma , Rahime ve Muhterem nâm evlâdı sıgārına vasiyy-i muhtâr olan sâhibü’l-izzi ve’l-iclâl sâhibü ezyâli’l-kadri ve’l-ikbâl zi’r-ra’yi el-münîr vezîr-i ekrem ve müşîr-i efham menât-ı mekālîdi’l-umûr Hazreti İbrahim Paşa b. Abdüşşekûr mahzarında ve merhûm-i mezbûrun kebîr oğulları Abdullah Bey ve Abdülhalil Bey mahzarında ve merhûmun Sultan bt. Sinan ve Kābile bt. Abdullah nâm iki zevcesi mahzarında, sâhibe-i hâzihi’s-sahîfe-i sahîha ve muvâfıka alâ menheci’ş-şerî‘ati’ş-şer‘iyye mefharü’l-muhadderât iklîletü’l-muhassenât Emine bt. merhûm-i mezkûr kıbelinden husûs-i âtiyyü’l-beyâna vekâleti bi mâ hüve tarîku’s-sübût şer‘an sâbit olan fahrü’l-kuzât Mevlâna Seyfullah b. Mehmed’den vekâleten sâdır olan da‘vâ-i sahîha-i şer‘iyyede gıbbe’l-istişhâdi’ş-şer‘î şöyle şehâdet ettiler ki, merhûm-i mezkûr hâl-i hayâtı ve kemâl-i sıhhat ve nefâz-i tasarrufât ve teberru‘âtında bizim yanımızda kebîre kızı müvekkile-i mezbûreye sâhibi ve mâliki olduğu, mahmiye-i Kostantıniyye’de vâki‘ Ayasofya-i kebîr Câmi‘i kurbunda kâin bulunan fevkānî ve tahtânî müte‘addid beyti ve avluyu hâvî, bir taraftan vâhib-i mezkûr mülkü, diğer taraftan Medîne-i münevvere vakfı, bir cânibden merhûm Hayreddin Bey mescidi ve diğer taraftan da tarîk-ı âm ile mahdûd cemî‘-i menzili cümle tevâbi‘ ve levâhıkı ve kâffe-i merâsim ve mürâfıkı ile hibe-i şer‘î ile hibe etmiş mezbûre de tesellüm etmiş idi. Şehâdetleri ba‘de ri‘âyeti şerâiti’l-kabûl inde’ş-şer‘ makbûl ve mûteber olmağın mûcibince hükmedildi. Cerâ fî evâili Şa‘bâni’l-mu‘azzam sene-i mezbûre. Şuhûdü’l-hâl: Hüseyin Efendi el-müderris bi medreseti Rüstem Paşa, Alâaddin el-kādî, Mustafa Çelebi el-kādî, Abdülkerim b. Abdüttâhir el-kādî, Sinan b. Derviş el-kādî, Ali Çelebi b. Sinan el-kādî, Mehmed Çelebi el-müderris, Abdülkerim el-müderris, Ahmed Dede [b.] Mustafa, Derviş Sinan Gāzi, İbrahim [b.] Şücâ‘, Mustafa b. Hüseyin? el-mülâzım ve gayruhüm