Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 121 Hüküm no: 95 Orijinal metin no: [26b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüsam Bey b. Abdullah’ın ağnam resmî tahsilinden Hamza b. Hüseyin’de alacağının olduğu iddiası Oldur ki, bundan akdem sene ihdâ ve elf târihinde Zağra’nın resm-i ağnâmını cem‘a me’mûr olan Hüsam Bey b. Abdullah nâm kimesne meclis-i şer‘a mahmiye-i Kostantıniyye mahallâtından Kürkçübaşı mahallesinde sâkin Hamza b. Hüseyin nâm kimesneyi ihzâr ve mahzarında takrîr-i kelâm edip târih-i mezkûrdan resm-i ağnâmını cem‘a me’mûr olduğum diyârda Çeriyân kulu dimekle ma‘rûf tâifenin resm-i ağnâmını cem‘ etmeği mezbûr Hamza’ya tefvîz etmem ile mezkûr Hamza zikr olunan kullardan ziyâde resm-i ağnâm cem‘ eylemiş iken bana yirmi altı bin akçesin teslîm edip bâkīsin teslîm etmemişdir, hâlâ taleb ederim dedikde, gıbbe’s-suâl mezbûr Hamza yirmi altı binden ziyâdesin inkâr edip mezkûr Hüsam Bey ziyâde-i mezkûreyi ta‘yîne ve ikāmet-i beyyineye kādir olmayıp vâki‘-i hâl ketb olundu. Fî 10 Şa‘bân sene 1002. Şuhûdü’l-hâl: El-Hâc Receb [b.] İbrahim el-imâm, el-Hâc Süleyman [b.] Halil el-mü’ezzin, Ali b. Abdullah es-silâhî, Mehmed b. Yusuf el-mü’ezzin, İbrahim b. Resûl el-imâm ve gayruhüm.