Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 124 Hüküm no: 100 Orijinal metin no: [27a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Hamid adlı sipahinin adamlarıyla Hacı Mahmud b. Musa’nın evini basarak eşyalarını gasbettiğinin anlaşıldığı Vilâyet-i Anadolu muzâfâtından Yakubbey derbendi kazâsına tâbi‘ Alınca nâm karye ahâlîsinden işbu râfi‘ü’l-kitâb Hacı Mahmud b. Musa nâm cebeci meclis-i şer‘-i refî‘ü’l-erkâna Kızkadı dimekle ma‘rûf Mehmed b. Hamid nâm kimesneyi ihzâr ve mahzarında takrîr-i da‘vâ edip bundan akdem ben sefer-i sultânîde iken mezbûr Mehmed sipâhi oğlanı nâmına bayrakla yanında yirmi neferden ziyâde yaraklı levend ile bî-vechin evim basıp ve kapımı paralayıp evim içinde dört aded mülk velençem ve iki aded mülk Yanbolu kebem ve iki gömleğim gasb edip zulüm etmişdir, hâlâ taleb ederin suâl olunsun dedikde, gıbbe’s-suâl ve akībe’l-inkâr ve’l-istişhâd udûl-ı Müslimînden Musa b. el-Hâc Pîrî ve Ali Reis b. el-Hâc Mehmed nâm kimesneler mahfil-i kazâda edâ-i şehâdet-i şer‘iyye edip fi’l-vâki‘ sâlifü’z-zikr Mehmed minvâl-i meşrûh üzre müdde‘î-i mezkûr el-Hâc Mahmud’un evin basıp kapısın paralayıp evi içinde dört aded mülk velençesin ve iki aded mülk Yanbolu kebesin ve iki gömleğini gasb edip zulüm eylemişdir. Biz bu husûsa şâhidleriz şehâdet dahi ederiz dediklerinde mezbûrânın şehâdetleri ba‘de’t-ta‘dîl hayyiz-i kabûlde vâkı‘a olup mâ vaka‘a bi’t-taleb ketb olundu. Tahrîren fî evâsıtı Şa‘bân sene 1002. Şuhûdü’l-hâl: Es-Sâbikūn.