Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 130 Hüküm no: 106 Orijinal metin no: [29a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Bey b. Ali’nin Mısır muhafaza beylerinden Sinan Bey’in evini satmak üzere vekili olduğunun tesbiti İşbu râfi‘ü’l-kitâb Hasan Bey b. Ali nâm kimesne meclis-i şer‘-i menî‘ü’l-erkâna zahrü’l-muhakkıkīn Mevlânâ Ali Efendi b. Abdurraûf nâm müderrisi ihzâr ve mahzarında takrîr-i kelâm edip hâlâ diyâr-ı Mısriye’de muhafaza beyi olan sülâletü’l-umerâ’i’l-kirâm Sinan Bey b. Abdüsselâm dâr-ı saltanat-ı seniyye mahmiye-i Kostantıniyye mahallâtından Kızılmağara mahallesinde vâki‘ bir tarafı İsmail Çavuş mülküne ve bir tarafı tarîk-i hâssa ve ba‘zı Benefşe Hâtun Vakfı’na ve iki tarafı tarîk-i âma ve hâssa muttasıl olan mülk menzilin bey‘a ve semenini kabz ve îsâle beni kendi kıbelinden vekîl nasb ve ta‘yîn etmeğin, menzil-i merkūmu bundan akdem vekâleten müşârun-ileyh Ali Efendi’ye yüz kırk bin akçeye bey‘-i bâtla bey‘ ve teslîm etmiş idim. Hâlâ meblağ-ı mezkûru müvekkilim müşârun-ileyh Sinan Bey’e îsâl için vekâletim hasebiyle taleb ederin dedikde, gıbbe’s-suâl mûmâ-ileyh Ali Efendi vekîl-i merkūmdan menzil-i mesfûru meblağ-ı merkūm ile iştirâ ettiğini i‘tirâf edip lâkin sâlifü’z-zikr Sinan Bey merkūm Hasan Bey’i semen-i mezkûru kabza tevkîlini inkâr edip istişhâd olundukda, udûl-ı Müslimînden Mevlânâ Sadi b. Ali el-müsta‘id ve el-Hâc Hasan b. Abdullah et-tâcir mahfil-i kazâda edâ-i şehâdet-i şer‘iyye edip fi’l-vâki‘ müşârun-ileyh Sinan Bey mezbûr Hasan Bey’i menzil-i mezkûru bey‘a ve semenini kabz ve îsâle kendi kıbelinden vekîl nasb ve ta‘yîn eylemişdir. Biz bu husûsa şâhidleriz, şehâdet dahi ederiz dediklerinde mezbûrânın şehâdetleri ba‘de’t-ta‘dîl hayyiz-i kabûlde vâkı‘a oldukda semen-i mezkûru vekîl-i mesfûra teslîm için müşârun-ileyh Ali Efendi’ye cânib-i şer‘-i mutahhardar tenbîh olunup mâ hüve’l-vâki‘ bi’t-taleb ketb olundu. Tahrîren fî evâhiri Şa‘bân sene 1002. Şuhûdü’l-hâl: Osman Efendi b. Umran, Ahmed b. Hüseyin, Ahmed b. Abdullah, Hızır b. Murad, Behrâm b. Abdullah ve’s-sâbikūn cemî‘an.