Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 131 Hüküm no: 107 Orijinal metin no: [29b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Behrâm’ın Ali Bey b. Yusuf’tan alacağını istemesi Kasaba-i Amasra ahâlîsinden Mehmed b. Behrâm nâm kimesne meclis-i şer‘-i menî‘ü’l-erkâna mahmiye-i Kostantıniyye’de Avratpazarı mahallesinde sâkin işbu râfi‘ü’l-kitâb Ali Bey b. Yusuf nâm kimesneyi ihzâr ve mahzarında takrîr-i kelâm edip bundan akdem mezkûr Ali Bey benden bi gayrı tarîk-i şer‘î yedi bin yüz seksen akçe ahz u kabz eylemiş idi. Hâlâ meblağ-ı mezkûru taleb ederin suâl olunsun [dedikde], gıbbe’s-suâl mezkûr Ali Bey cevâb verip fi’l-vâki‘ mukaddemâ sâlifü’z-zikr Mehmed bana zikr olunan mikdâr akçe teslîm etmiş idi. Lâkin el-Hâc Hüsrev nâm kimesnenin emânetidir deyû teslîm edip ba‘dehû meblağ-ı mezkûru geri benden bi’t-tamâm ahz u kabz etdi. Bende meblağ-ı mezbûrdan bir akçe ve bir habbe bâkī kalmadı dedikde, mezkûr Mehmed’e bi’l-muvâcehe suâl olundukda cevâb verip merkūm Ali Bey bana meblağ-ı mezbûru devir tarîkiyle teslîm edip muvâza‘a eylemişdir dedikde tarafeynden sâdır olan kelâm bi’t-taleb ketb olundu. Tahrîren fî evâhiri Ramazan sene isneteyn ve elf. Şuhûdü’l-hâl: Muslihiddin b. Yerdem? [Pîrî?], Muslihiddin b. Abdullah el-imâm, Hacı Hüseyin b. Abdullah, Hüseyin b. Abdülmümin, Halil b. Hacı Mahmud er-râcil.