Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 133 Hüküm no: 110 Orijinal metin no: [30a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Süleyman Çavuş’un Abdullah Efendi b. el-Hâc Nasuh’a olan borcuna mehil istemesi Mahmiye-i Kostantıniyye mahallâtından Hoşkadem mahallesinde sâkin Dergâh-ı âlî çavuşlarından Süleyman Çavuş b. Abdullah nâm kimesne meclis-i şer‘-i refî‘ü’l-erkâna hâzır olup işbu râfi‘ü’l-kitâb fahrü’l-muhakkıkīn Mevlânâ Abdullah Efendi b. el-Hâc Nasuh el-müderris mahzarında bi’t-tav‘ ve’r-rızâ ikrâr ve i‘tirâf edip mezkûr Abdullah Efendi’ye cihet-i karzdan zimmetimde lâzımü’l-edâ ve vâcibü’l-kazâ elli altı bin akçe deynim olup târih-i kitâbdan on beş gün tamâmına meblağ-ı mezkûrun cümlesin mesfûr Abdullah Efendi’ye edâya müte‘ahhid oldum dedikde, merkūm Abdullah Efendi dahi mukırr-ı mezbûru ikrâr-ı meşrûhunda bi’l-muvâcehe tasdîk etdikden sonra mezbûr Süleyman Çavuş zikr olunan on beş gün tamâmına dek meblağ-ı mezbûru bi’t-tamâm kendiye edâ için imhâl edip vâki‘-i hâl ketb olundu. Tahrîren fî 24 Şa‘bân sene isneteyn ve elf. Şuhûdü’l-hâl: Ali b. Ramazan el-müsta‘id, Mehmed Çavuş el-mübâşir, Mevlânâ Mehmed Efendi [b.] Mustafa el-müderris, Muslihiddin [b.] Pîrî ve gayruhüm.