Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 136 Hüküm no: 117 Orijinal metin no: [30b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hançerli Sultan Vakfı eski mütevellisi Mahmud Bey b. Kasım Bey’in vakfa olan borcunu ödemesi Mahrûsa-i Bursa’da vâki‘ merhûme Hançerli Sultan Vakfı’na hâlâ evlâdından mütevellî olan işbu râfi‘ü’l-kitâb Abdullah Bey b. Kasım Bey nâm kimesne meclis-i şer‘-i refî‘ü’l-erkâna, Dergâh-ı âlî çavuşlarından fahrü’l-akrân Yakub Çavuş b. Süleyman mübâşeretiyle vakf-ı mezbûra sâbıkan mütevellî olan karındaşı Mahmud Bey b. Kasım Bey nâm kimesneyi ihzâr ve mahzarında takrîr-i kelâm edip bundan akdem mezbûr Mahmud Bey zamân-ı tevliyetinde vakf-ı mezbûrun medresesinin kurşunun soyup satıp bahâsın geri vakfa harc etmeyip zikr olunan kurşun bahâsından uhdesinde otuz bir bin akçe bâkī kalmışdır. Hâlâ meblağ-ı mezbûru tevliyetim hasebiyle taleb ederin suâl olunsun dedikde, gıbbe’s-suâl merkūm Mahmud Bey, fi’l-vâki‘ zikr olunan medresenin kurşunu bahâsından uhdemde lâzımü’l-edâ otuz bir bin akçe vardır deyû tav‘an ikrâr ve i‘tirâf etmeğin meblağ-ı mezkûru cânib-i vakfa bi’t-tamâm teslîm için kıbel-i şer‘-i şerîfden mesfûr Mahmud Bey’e tenbîh olunup vâki‘-i hâl bi’t-taleb ketb olundu. Tahrîren fî evâsıtı Ramazâni’l-mübârek sene 1002. Şuhûdü’l-hâl: Abdi Çavuş el-kā’idü’s-sultânî, Hasan b. Abdullah m[ezbûr], Mehmed b. el-Hâc Mehmed, Murad b. Hızır m[ezbûr], el-Hâc Mehmed b. Osman el-mütevellî.