Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 137 Hüküm no: 118 Orijinal metin no: [30b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mahmud Bey b. Kasım’ın Hüsrev Kethüdâ Vakfı’na olan borcundan kalanını vakıf nazırına ödediği Mahmiye-i Kostantıniyye’de vâki‘ merhûm Hüsrev Kethüdâ Vakfı’na hâlâ mütevellî olan el-Hâc Mehmed b. Osman nâm kimesne meclis-i şer‘-i şerîfe Hançerlizâde dimekle ma‘rûf Mahmud Bey b. Kasım nâm kimesneyi ihzâr ve mahzarında takrîr-i kelâm edip mütevellîsi olduğum vakf-ı mezbûr mâlından mesfûr Mahmud Bey zimmetinde cihet-i karzdan otuz bin akçe var idi, on beş bin akçesin bundan akdem ben alıp kabz edip hâlâ zimmetinde on beş bin akçesi bâkīdir, tevliyetin hasebiyle taleb ederin dedikde, gıbbe’s-suâl mezkûr Mahmud Bey cevâb verip fi’l-vâki‘ sâbıkan vakf-ı mezbûr mâlından zimmetimde otuz bin akçe var idi. Lâkin ba‘dehû on beş bin akçesin mütevellî-i mezbûr el-Hâc Mehmed’e teslîm edip ve on beş bin akçesin dahi vakf-ı mezbûrun nâzırı olan Mehmed Bey b. Abdullah’a teslîm eyledim. Meblağ-ı mezkûrdan uhdemde bir akçe ve bir habbe bâkī kalmamışdır dedikde merkūm Mahmud’un vech-i meşrûh üzre olan kelâmı mütevellî-i mesfûr el-Hâc Mehmed talebi ile ketb olundu. Tahrîren fî evâsıtı Ramazan sene 1002. Şuhûdü’l-hâl: Yakub Çavuş b. Süleyman, Abdi Çavuş b. Mustafa el-mübâşir, Hasan b. Abdullah, Murad b. Hızır.