Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 141 Hüküm no: 125 Orijinal metin no: [31b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Naime bt. Ahmed Çelebi’nin Manisa’da vefat eden akrabasından kalan eve Beytülmâl emini Mehmed Çelebi’nin müdâhalesinin önlenmesi Mahmiye-i Kostantıniyye’de Avratpazarı kurbunda vâki‘ Hobyar mahallesinde sâkine işbu sâhibetü’l-kitâb Naime bt. Ahmed Çelebi nâm hâtunun zevci ve husûs-ı âti’z-zikre vekîli olup vekâleti nehc-i şer‘î üzre sâbite olan fahrü’l-akrân Ahmed Bey b. Abdürrezzak ez-zevvâku’s-sultânî meclis-i şer‘-i refî‘ü’l-bünyâna hâzır olup mahmiye-i mezkûrede hâlâ beytülmâl-ı hâs emîni olan kıdvetü’l-a‘yân Mehmed Çelebi mahzarında takrîr-i kelâm edip mahalle-i mezkûre sâkinlerinden iken medîne-i Manisa’da bundan akdem vefât edip usûbet-i sebebiyye cihetinden verâseti zevcim mezkûre Naime’ye munhasıra olan merhûm Mehmed b. Mustafa’nın muhallefâtından mahalle-i mezkûrede vâki‘ bir beyt-i süflâ ve bir gurfe ve bir sofa ve bir kenîf ve bir muhavvatayı müştemil bir tarafı merhûm Yahnici İsmail Vakfı’na ve bir tarafı Mustafa b. Üveys Vakfı’na ve bir tarafı Aynî bt. Ali Vakfı’na ve bir tarafı tarîk-i hâssa muttasıl olan menzil cânib-i beytülmâla âiddir deyû emîn-i mezkûr ta‘arruz eder, cânib-i şer‘-i mutahhardan men‘ olunmasın taleb ederin dedikde, gıbbe’s-suâl emîn-i müşârun-ileyh mezkûre Naime’nin verâsetini inkâr edip istişhâd olundukda, mahalle-i mezbûrede ve civârında sâkin olan udûl-ı Müslimînden Hasan Halîfe b. Davud el-imâm ve Mahmud Halîfe b. Mehmed el-imâm ve Veli Bey b. İsa el-cündî ve Ahmed Bey b. Mustafa ez-za‘îm ve Hızır Bey b. Hamza ez-zürrâ‘ ve sâirleri mahfil-i kazâya li ecli’ş-şehâde hâzırûn olup edâ-i şehâdet-i şer‘iyye edip fi’l-vâki‘ mahalle-i mezkûre sâkinlerinden olup menzil-i mezkûrun mâliki iken medîne-i Manisa’da vefât eden merhûm sâlifü’z-zikr Mehmed’in cihet-i mezbûreden verâseti müvekkile-i mesfûre Naime’ye munhasıradır, menzil-i mezkûr merkūme Naime’nin mülk-i mevrûsudur, biz bu husûsa şâhidleriz, şehâdet dahi ederiz dediklerinde mezbûrûnun şehâdetleri ba‘de’t-ta‘dîl hayyiz-i kabûlde vâkı‘a oldukda emîn-i mezkûr menzil-i mesfûra ta‘arruzdan men‘ olunup vâki‘-i hâl gıbbe’s-suâl ketb olundu. Tahrîren fi’l-yevmi’s-sâdis aşer min şehri Ramazan sene isneteyn ve elf. Şuhûdü’l-hâl: Hasan Çelebi b. Üveys ez-zevvâku’s-sultânî, Mahmud Bey b. Ali ez-za‘îm, Receb Çelebi b. Hamza ez-zürrâ‘, Osman Bey b. Abdullah el-cündî, Ali b. Haydar, Hızır b. Sadullah, Hacı Bâli b. Hızır, Mehmed b. Hamza.