Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 154 Hüküm no: 141 Orijinal metin no: [35a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Müderris Abdullah Efendi’nin alacağını tahsil için Müderris Ahmed Efendi’ye vekalet vermesi Oldur ki, mahmiye-i Kostantıniyye mahallâtından Sultan mahallesinde sâkin Mevlânâ Abdullah Efendi b. el-Hâc Nasuh el-müderris meclis-i şer‘-i refî‘ü’l-erkâna hâzır olup işbu râfi‘ü’l-kitâb Mevlânâ Ahmed Efendi b. Pîrî el-müderris mahzarında ikrâr ve i‘tirâf edip bundan akdem Dergâh-ı âlî çavuşlarından Süleyman Çavuş b. Abdullah zimmetinde karzdan elli altı bin akçe hakkım olup lâkin meblağ-ı mezkûrun beş bin yedi yüz akçesin kabz edip meblağ-ı mezbûrdan zimmetinde elli bin üç yüz akçe bâkī kalmışdı. Hâlâ bâkī-i mezbûru merkūm Süleyman Çavuş yedinden kabza ve bana îsâle ve kabz ve îsâl [35b] tevakkuf eylediği murâfa‘a ve muhâsama ve sâir umûra merkūm Ahmed Efendi’yi kendi kıbelimden vekîl nasb ve ta‘yîn eyledim dedikde, mezkûr Ahmed Efendi dahi bi’l-muvâcehe vekâlet-i merkūmeyi kabûl ve mûcibini mültezim oldum deyip vâki‘-i hâl gıbbe’s-suâl ketb olundu. Tahrîren fî evâhiri şehri Ramazâni’l-mübârek sene isneteyn ve elf. Şuhûdü’l-hâl: Ahmed b. Abdullah, Hasan Çavuş [b.] Abdullah, Mustafa Bey b. Ahmed, Veli b. Gülâbî ve gayruhüm.