Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 162 Hüküm no: 155 Orijinal metin no: [37a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin Bey b. Emircan ile el-Hâc Derviş b. Mutahhar’ın ticarî ortaklıktan doğan anlaşmazlıklarında sulh olmaları Oldur ki, mahmiye-i Kostantıniyye mahallâtından Perviz Ağa mahallesinde sâkin Hüseyin Bey [b.] Emircan nâm cevherî tarafından husûs-ı âti’z-zikri ikrâra vekîl olup vekâleti Şeyh Mehmed b. Hoca Küçük ve el-Hâc Abdülaziz b. el-Hâc Mehmed şehâdetleriyle sâbite olan fahrü’l-akrân Mehmed Çavuş b. Esedullah meclis-i şer‘-i şerîfe hâzır olup Karagümrük mahallesinde sâkin işbu râfi‘ü’l-kitâb el-Hâc Derviş b. Mutahhar nâm acem mahzarında takrîr-i kelâm edip bundan akdem müvekkilim sâlifü’z-zikr Hüseyin Bey merkūm el-Hâc Derviş’e kendi mâlından mudârebe tarîkiyle bi’d-defe‘ât üç yüz yirmi bin akçe teslîm edip ba‘dehû merkūm el-Hâc Derviş meblağ-ı merkūm ile cevher ve sâir emti‘a alıp ticâret etdikden sonra re’s-i mâlı rabb-ı mâla teslîm edip ba‘dehû rıbhı için mâ-beynlerinde nice nizâ‘ ve husûmet vâki‘ olmuş idi. Hâlâ muslihûn tavassut etmeğin, müvekkilim sâlifü’z-zikr Hüseyin Bey ve merkūm el-Hâc Derviş husûs-ı mezbûra müte‘allik cemî‘-i nizâ‘ ve husûmetlerinden rızâlarıyla ferâğ etmişlerdir deyû vekâleten ikrâr ve i‘tirâf eyledikde, vekîl-i mezbûrun ikrâr-ı meşrûhun merkūm el-Hâc Derviş vicâhen tasdîk ve şifâhen tahkīk edip mâ vaka‘a bi’t-taleb ketb olundu. Fî evâhiri Şevvâl sene-i mezbûre. Şuhûdü’l-hâl: El-Hâc Zahid b. [Seşi] Şemsi Bey, Kenan b. Abdullah, el-Hâc Receb [b.] el-Hâc Ahmed, Piyâle b. Abdullah, Bîkes? Efendi el-müderris.