Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 162 Hüküm no: 156 Orijinal metin no: [37a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Süleyman b. Müstecab’ın vârislerinin beytülmâl tarafından el konulan ve satılan kölesinin bedelini talep ettikleri Mahrûsa-i Galata hâricinde vâki‘ el-Hâc Memi mahallesi sâkinlerinden olup sefîne ile Abaza’dan gelirken Şile nâhiyesi yalısında garîk olan Süleyman b. Müstecâb nâm kimesnenin Hatice ve Ümmî nâm sagīrelerine kıbel-i şer‘-i şerîfden vasî olup müteveffâ-yı merkūmun zevci olan Gülbahar bt. Abdullah nâm hâtun meclis-i şer‘a mahmiye-i Kostantıniyye’de hâlâ beytülmâl-ı hâs emîni olan fahrü’l-a‘yân Mehmed Çelebi tarafından husûs-ı âti’z-zikre vekîl olup kâtibi olan Mehmed Çelebi b. Hüseyin ve husûs-ı mezbûra mübâşir ta‘yîn olunan Abdülkerim b. İlyas nâm kapıcıyı ihzâr ve mahzarlarında takrîr-i kelâm edip bundan akdem sefîne-i mezkûre helâk oldukda ashâbı garîk olan muhallefâtı kabz için beytülmâl cânibinden mezbûrlar irsâl olundukda, mûrisimiz mezkûr Süleyman’ın muhallefâtından Gürciyyetü’l-asl gök gözlü kısa boylu sarışın ( ) bt. Abdullah nâm bir mülk câriyesin mezkûrlar beytülmâla âidedir deyû zabt edip dört bin iki yüz akçeye bey‘ eylemişler. Hâlâ semen-i mezkûru taleb ederiz dedikde, gıbbe’s-suâl mezkûrân Mehmed Çelebi ve Abdülkerim câriye-i mevsûfe-i mezkûre garîk-i mezbûr Süleyman’ın mülkü idiğini inkâr edip istişhâd olundukda udûl-ı Müslimîn Abdurrahman b. İbrahim ve Mehmed b. Mirza nâm kimesneler mahfil-i kazâda bi’l-muvâcehe edâ-i şehâdet-i şer‘iyye edip fi’l-vâki‘ mezbûrân Mehmed Çelebi ve Abdülkerim beytülmâl için zabt eyledikleri câriye-i mevsûfe-i mezkûre garîk-i merkūm Süleyman’ın mülk-i mahzı ve hakk-ı hâlisi iken mezbûrlara vefâtıyla intikāl edip semen-i mezbûra bey‘ eylemişlerdir. Biz bu husûsa şâhidleriz, şehâdet dahi ederiz dediklerinde mezbûrânın şehâdetleri ba‘de’t-ta‘dîl hayyiz-i kabûlde vâki‘ olup mâ vaka‘a bi’t-taleb ketb olundu. Tahrîren fî 8 min Şevvâl sene 1002. Şuhûdü’l-hâl: Mehmed b. Abdullah, Mehmed b. Ramazan, Nasuh b. Hamza, Mustafa b. Hamza, Hasan b. Abdullah.