Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 164 Hüküm no: 158 Orijinal metin no: [37b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şahbula Hatun Vakfı mütevellisinin Semendire Sancakbeyi Ali Bey’de olan vakıf alacağını kefili Hüsrev b. Abdullah’tan istemesi Mahmiye-i İstanbul’da vâki‘ merhûme Şahbula Hâtun Vakfı’na hâlâ mütevellî olan işbu râfi‘ü’l-kitâb Mustafa b. Abdurrahman nâm kimesne nefs-i Adana sâkinlerinden Hüsrev b. Abdullah nâm sipâhiyi meclis-i şer‘-i şerîfe Dergâh-ı âlî çavuşlarından fahrü’l-akrân Osman Çavuş mübâşeretiyle ihzâr ve mahzarında takrîr-i kelâm edip hâlâ Semendire Beyi olan mefharü’l-ulemâ’i’l-kirâm Ali Bey b. Sinan Bey zimmetinde mütevellîsi olduğum vakf-ı mezbûr mâlından yirmi bin akçe cihet-i karzdan ve iki bin akçe çuka bahâsından cem‘an yirmi iki bin akçe olup meblağ-ı mezbûra merkūm Hüsrev emr u kabûlü hâviye kefâlet ile kefîl olmuş idi. Hâlâ meblağ[-ı mezbûru] kefîl-i mezbûrdan vakf için tevliyetim hasebiyle taleb ederin suâl olunsun dedikde, gıbbe’s-suâl merkūm Hüsrev kaziyye minvâl-i meşrûh üzre idiğini tav‘an ikrâr ve i‘tirâf etmeğin, kıbel-i şer‘-i mutahhardan mübâşir-i mezkûra meblağ-ı mezbûru kefîl-i merkūmdan cânib-i vakfa alıver deyû tenbîh olunup mâ vaka‘a bi’t-taleb ketb olundu. Tahrîren fî 15 min Şevvâl sene 1002. Şuhûdü’l-hâl: Hacı Mahmud Çavuş bi dergâhı âlî, Mustafa b. Ali, Ali b. Mustafa, Süleyman b. Mahmud, Mustafa b. Hamza, Sinan b. Durmuş.