Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 163 Hüküm no: 157 Orijinal metin no: [37b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Müderris Muharrem Çelebi’nin Hüseyin Çavuş b. Abdullah tarafından el konulan atın sahibi olduğu Vilâyet-i Anadolu muzâfâtından Ankara nâm kasaba sâkinlerinden işbu sâhibü’l-kitâb Mevlânâ Muharrem Çelebi b. Veli nâm müderris tarafından husûs-ı âti’z-zikre nehc-i şer‘î üzre vekâleti sâbite olan Mevlânâ Mustafa b. el-Hâc Ali el-müderris meclis-i şer‘-i şerîfe Bölük çavuşlarından fahrü’l-akrân Hüseyin Çavuş b. Abdullah nâm kimesneyi ihzâr ve mahzarında takrîr-i kelâm edip hâlâ merkūm Hüseyin Çavuş vâzı‘u’l-yed olduğu işbu alnı ağar siyah tüylü iki ard ayakları ve bir ön ayağının sağ tarafı siğil aygır at müvekkilim sâlifü’z-zikr Muharrem Çelebi’nin mülkü olup hâlâ merkūm Hüseyin Çavuş bi gayrı tarîk-i şer‘î zikr olunan ata vâzı‘u’l-yed olmuşdur, vekâleten taleb ederin suâl olunsun dedikde gıbbe’s-suâl zevi’l-yed olan mezkûr Hüseyin Çavuş zikr olunan at müvekkil-i merkūm Muharrem Çelebi’nin mülkü idiği inkâr edip istişhâd olundukda udûl-ı Müslimînden Mevlânâ Yusuf b. Mustafa el-mülâzım ve Cabir b. Mahmud el-mülâzım mahfil-i kazâda bi’l-muvâcehe edâ-i şehâdet-i şer‘iyye edip fi’l-hakīka işbu evsâfla mevsûf olan at müvekkil-i merkūm Muharrem Çelebi’nin mülk-i mahzı ve hakk-ı hâlisidir, biz bu husûsa şâhidleriz, şehâdet dahi ederiz dediklerinde, mezbûrânın şehâdetleri ba‘de’t-ta‘dîl hayyiz-i kabûlde vâkı‘a olup mâ vaka‘a bi’t-taleb ketb olundu. Tahrîren fî 13 Şevvâl sene 1002. Şuhûdü’l-hâl: Mehmed b. el-Hâc Mehmed, Ahmed b. Hüseyin, Ahmed b. Abdullah, Hasan b. Abdullah, Süleyman b. Mahmud.