Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 165 Hüküm no: 160 Orijinal metin no: [37b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yağmacı olduğu gerekçesiyle hapse atılan Mehmed Reis’in kadı Ahmed Efendi tarafından el konulan parasını aldığı ve davadan vazgeçtiği Vilâyet-i Rumeli’nde Kızılhisar kazâsı ahâlîsinden Mehmed Reis b. Mustafa nâm kimesne meclis-i şer‘-i şerîfe hâzır olup kazâ-i mezbûrdan munfasıl olan Mevlânâ Ahmed nâm kadının babası ve husûs-ı âtîye vekîl-i şer‘îsi olan Yusuf b. Süleyman nâm kimesne mahzarında takrîr-i kelâm edip bundan akdem mezbûr Ahmed Efendi kazâ-i merkūmda kadı iken deryâda helâk olan sefînelerden esbâb aldın deyû beni habs edip ve otuz iki aded sikke flori alıp ve esâs-ı beytten bir ihrâm ve iki yorgan ve iki çarşaf ve bir makrama [38a] alıp, ba‘dehû meblağ-ı merkūmu ve esbâb-ı mezkûru da‘vâ eylediğimde tav‘an i‘tirâf eylemiş idi. Hâlâ mezbûr Ahmed Efendi yedinden zikr olunan otuz iki aded sikke floriyi ve bir ihrâmı aynıyla alıp kabz edip bâkī kalan esbâbı da‘vâdan rızâmla ferâğ eyledim dedikde, mukırr-ı mezbûrun kelâm-ı meşrûhunu vekîl-i mesfûr vicâhen tasdîk ve şifâhen tahkīk edip mâ vaka‘a bi’t-taleb ketb olundu. Tahrîren fî 3 min Şevvâl sene 1002. Şuhûdü’l-hâl: Mehmed Bey b. Sinan es-silâhî, Süleyman b. Mahmud, Müstedâm b. Abdullah, Behrâm b. Abdullah, Mustafa b. Hamza.